MAE Enkoraja Komunidade Manufahi ba Vasina

by -243 views
Ministru Administrasaun Estatál (MAE), Miguel Pereira de Carvalho

MANUFAHI (Timor Post)—Ministru Administrasaun Estatál (MAE), Miguel Pereira de Carvalho, husu ba komunidade munisípiu Manufahi partisipa programa vasina kontra Covid-19 iha Timor.

“Ita tenke ba vasina tanba laiha ai moruk ida hodi kura Covid-19 no moras ne’e ninia ai moruk mak vasina, tanba ho vasina ita bele iha forsa no iha rezisténsia imunidade hodi salva ita nia a’an”, hatete ministru Miguel liuhusi intervensaun iha salaun administrasaun munisípiu Manufahi, Segunda (04/10).

Iha Manufahi ema ne’ebé simu ona vasina primeiru doze no segundu doze foin iha munisípiu Manufahi foin mak atinji 26 porsentu ne’e duni tenke aselera informasaun vasina nune’e hodi atinji 80 porsentu. .

Governante ne’e adianta mós estadu ho governu esforsu maka’as ba pesoál liña frente hanesan profesionais saúde, polisia, lideransa komunitariu, xefe suku, xefe aldeia, inklui Pesoál Apoiu Suku (PAS) sira nia diretu.

“Durante ne’e ema barak levanta subsídiu, maibé tinan ida ne’e governu sentrál aprova ona dekretu lei ida subsídiu liña frente ba lideransa komunitariu maibé tenke hatama naran iha lista. Naran ne’ebé atu hatama tenke hare ida ne’ebé halo serbisu no merese maibé ida ne’e la halo serbisu toba hela iha uma ne’e la merese ne’e lalika hatama naran selae sira ne’ebé responsavel mak sei tomak responsabilidade ba ida ne’e”, informa Miguel.

Iha fulan-rua ba kotuk MAE haruka ona lista ida ba Ministériu Finansas (MF) atu halo transfere osan ba autoridade sira nia konta bankária hodi selu liña frente maibé MF resposta katak orsamentu tinan kotuk seidauk iha relatóriu.

“Ha’u enkoraja administradór postu administrativu to’o munisípiu to’o lideransa komunitáriu sira atu submete relatóriu nune’e bele hetan fila fali subsídiu liña frente no ida ne’e aplika mós ba ekipa komisaun task force covid-19 munisípiu” apela MAE. (lcl)

No More Posts Available.

No more pages to load.