Madalena Tanis Atu Ba Ona Oekusi

by -1.507 views
Madalena Caet ho kondisaun fízika defisiente ain hamos matan hafoin tanis husu nia Ama atu ba Oe-cusse. (Foto TP/Orlando Oqui)

(Reportájen Orlando Oqui/ Editor Rosa Garcia)

DILI (Timor Post) – Madalena Caet ho kondisaun fízika defisiente ain toba kalan haat (4) ona ho nia inan Domingas Eko iha edifísiu RAEOA-ZEESM, maibé dader-dader hadeer mai sempre tanis no husu ba nia inan atu ba ona Oekusi.

Inan husi Madalena Caet, Domingas Eko haktuir, durante kalan no loron haat iha ne’e (edifísiu RAEOA-ZEESM), nia (Madalena) hadeer mai sempre husu ho tanis hodi ba ona Oekusi.

“Ami toba de’it iha ne’e hodi hein Prezidente autoridade mai hodi urus ró ne’e, tanba labarik ne’e dader-dader tanis atu ba ona Oekusi maibé ró la halai ami atu ba halo nusa”, haktuir Domingas ba Timor Post iha edifísiu RAEOA-ZEESM iha Faról-Dili, Sesta (21/05).

Edifisiu ne’ebé mak Madalena ho nia Ama toba durante kalan 4 ona iha edifísiu RAEOA-ZEESM Faról-Dili. (Foto TP/Orlando Oqui)

Domingas konta, nia parte ho nia oan mai iha Dili ho objetivu atu buka dalan ba nia oan nia moras ne’e iha inisiu fulan Marsu, depois mai to’o Dili mak governu deklara serka sanitaria no to’o loron 04 fulan Abríl akontese tan inundasaun, ne’e mak seidauk ba Oekusi tanba ró Berlin Nakroma no Susesu la hala’o operasaun ba mai Dili-Oekusi.

Tanba ne’e, nia husu ba governu liuliu prezidente autoridade Oekusi buka ona solusaun atu bele rezolve situasaun ne’e, tanba povu Oekusi terus demais liu ona iha kapitál Dili.

“Ha’u husu ba Prezidente autoridade buka lalais solusaun mai ami, tanba ami hela iha Dili ne’e iha ema nia uma depois foin lalais inundasaun tan, rai halai estraga tiha ema nia uma ne’ebé ami hela ba ne’e, entaun ami ba hela provizóriu iha Dom Bosco no agora mai toba tan iha ne’e”, hatutan nia.

Enkuantu, Oekusi-oan ne’ebé mak toba iha edifísiu RAEOA-ZEESM Faról-Dili hamutuk na’in 500 kompostu husi labarik ki’ik ona na’in 40, estudante 200-resin no ferik-katuas na’in 200-resin.

Hatán ba kestaun ne’e, Prezidente Autoridade RAEOA, Arsénio Bano, hatete Autoridade Okusi kontinua halo esforsu prepara kondisaun iha Oekusi no harii kapasidade kuarentena ba ema na’in 100-200 iha portu Mahata, hodi bele simu no fasilita pasajeiru sira mai husi Dili.

“Iha semana ne’e nia laran, prosesu konstrusaun sei hahú. Objetivu husi polítika ida ne’e atu kontinua prevene moras la tama no mantein kontrola Covid-19 iha RAEOA hodi bele proteje ita nia inan aman sira hamutuk na’in 85000 iha RAEOA, ne’ebé agora daudauk provisoriamente seguru tan laiha tranzmisaun lokál ka komunitaria”, afirma nia.

Nia husu ba hotu-hotu iha Dili kontinua buka dalan hodi hetan vasina AstraZeneca no hakbesik-an ba Governu sentrál hodi hetan tulun ba ai-han seluk ne’ebé Governu deside atu oferese ba komunidade hotu-hotu iha Dili.

“Autoridade sei kontinua informa situasaun ne’e ba Governu sentrál hodi fasilita tulun ba ita boot sira iha rai boot. Prioridade importante mak inan aman no maluk sira na’in 85000 hela iha Oekusi seguru husi moras Covid-19”, hatutan tan nia.

Autoridade RAEOA lakohi foti risku hatama RAEOA iha situasaun tranzmisaun lokál no tranzmisaun komunitaria Covid-19, tanba fasilidade Saúde iha Oekusi iha Hospital hanesan oxygen no ventiladór seluk tan limitadu.

Nia dehan, Oekusi mós iha komunidade barak, ferik no katuas ne’ebé iha moras TB, tensaun, hepatitis ne’ebé frajil ba Covid-19 atu oho ema bainhira sira hetan moras Covid-19.

Prezidente autoridade RAEOA-ZEESM ne’e hatutan, bainhira kondisaun kuarentena sufisiente ona autoridade RAEOA sei normaliza hodi transporta ema no sasán ba mai Oekusi-Dili.

“Husu pasiénsia hodi ita konsege hasees Oekusi husi moras Covid-19 liuliu tranzmisaun lokál no tranzmisaun komunitaria. Maski ita boot sira hirus lagosta desizaun ne’e maibé prioridade mak ema 85000 atu labele hetan moras hada’et Covid-19 iha RAEOA”, hakotu nia.(Lee notísia seluk iha jornál Timor Post)

No More Posts Available.

No more pages to load.