Luta ba Libertasaun, Norberto Husu Sarani Tane Matebian Sira Nia Sakrifísiu

husi -69 views

Timor Post (07/09/2020)-Bispu Dioseze Maliana, Dom Norberto do Amaral, husu ba povu Timor-Leste liuliu ba sarani sira tenke tane as matebian sira nia sakrifísiu iha prosesu Timor-Leste luta ba ukun rasik-an.

“Ita hotu ne’ebé sei moris ne’e tenke tane lisuk sakrifísiu ne’e, mate raan fakar, sira nia ruin naklekar iha foho leten fatuk kuak ne’ebé to’o ohin loron sei dauk halibur hotu, tanba ho sira nia mate mak ita nia moris”, hatete Bispu Norberto ba jornalista sira hafoin remata misa kari Ai-funan ba Padre Nain tolu ne’ebé mate fatin iha Igreja Ave Maria Suai, Domingu (06/09).

Bispu husu ba sarani sira katak tenke valoriza ema sira nia kosar been, sira nia ran fakar tanba hakarak atu rai ida ne’e hetan ulun rasik-an.

Bispu haktenik, katak ema sira ne’e mate tanba defende justisa, tanba defende liberdade tanba defende povu nia di’ak atu defende povu nia moris iha trankuilidade pás hakmatek nia laran.
Entretantu padre Nain tolu ne’ebé fó ann ba mate hamutuk ho povu Suai iha Masakre (6/9/99) ka Setembru Negro maka Pe.Hilário Madeira, Pe.Tarsisius Dewanto no Pe. Francisco Soares.(Jornalista Julio Salinas Soares)