Lú Olo: Timor Leste Presiza Nafatin Prezidente Repúblika Ida iha Koñesimentu Klean Kona-ba Relasaun Internasionál, “Ha’u Sei Brani Nafatin Foti Desizaun”

by -1.338 views
Kandidatu Prezidente Repúblika periodu 2022-2027, Francisco Guterres Lú Olo

Dili (Timor Leste)—Kandidatu Prezidente Repúblika periodu 2022-2027, Francisco Guterres Lú Olo subliña, Timor Leste presiza nafatin prezidente repúblika ida ne’ebé iha koñesimentu klean kona-ba relasaun internasionál.

“Tanba liuhusi parseria bilateral no multilateral ho rai sira seluk mak ita bele hala’o dezenvolvimentu sósiu-ekonómiku no hametin ita nia soberania nasionál,” Lú Olo afirma bainhira deklara kandidatu ba prezidente repúblika, iha Parókia Imaculada Conceição iha Ermera, Domingu (16/01/2022).

Lú Olo hatutan, sei kontinua habelar nafatin relasaun ho komunidade internasional.

Lú Olo subliña, bazeia ba konstituisaun RDTL fó mandatu daruak nu’udar prezidente repúblika, maka nia ho kiit tomak prontu atu la’o ba oin.

Lú Olo hatete, hahú husi tinan 1974 no liuhusi prosesu luta naruk durante tinan 24 iha ailaran no husi loron restaurasaun independénsia, nia hatene nia-an hanesan ho timoroan hotu-hotu.

“Ha’u sei kandidatu ba dala ida tan atu sai prezidente repúblika ba Timor Leste no ba povu tomak,” Lú Olo hatete.

“Ha’u sei brani nafatin foti desizaun tuir kbiit ne’ebé konstituisaun RDTL fó mai ha’u nu’udar prezidente repúblika no tuir ha’u nia konsiénsia rasik,” Lú Olo hatete.

Nia hatutan, kaer metin nafatin konstituisaun no lei sira tanba instrumentu sira ne’e maka fó kbiit ba nia atu kontribui ba hametin estadu Timor Leste no lori moris di’ak ba povu tomak.

“Ha’u sei defende nafatin unidade de estadu no unidade povu Timor Leste nian. Hala’o nafatin diálogu ho titular órgaun soberania sira hodi haree oinsá hatan ba preokupasaun povu tomak nian,” Lú Olo subliña.

Nia sei hala’o nafatin diálogu ho partidu polítiku sira, ho parte hotu hodi buka konsensu, defende inkluzaun sosiál, luta hasoru injustisa no KKN atu hotu-hotu sente nain ba Ukun-An. (cao)

No More Posts Available.

No more pages to load.