Lú Olo Promulga Lei OJE 2022, Governu iha Prioridade Neen

by -1.014 views
Prezidente Repúblika Francisco Guterres Lú Olo

Dili (Timor Post)—Prezidente Repúblika Francisco Guterres Lú Olo ho kbiit konstitusionál promulga tiha ona Lei Orsamentu Jerál Estadu (OJE) tinan fiskal 2022 hafoin tetu klean Diploma n°55/V ne’ebé dekreta husi Parlamentu Nasionál, iha 16 dezembru liubá.

Komunikadu ba imprensa ne’ebé Timor Post assesu husi Palásiu Prezidensiál iha loron 03/01/2021 subliña, tuir Konstituisaun haruka (liuhusi artigu 115, n°1, alínea d) no artigu 145°, n°1), tinan-tinan, Governu mak iha kbiit atu prepara proposta-Lei refere ba Orsamentu Jerál Estadu (OJE).

Governu hato’o proposta-Lei kona-ba OGE 2022 ba Parlamentu Nasionál iha 15 outubru 2021, ho montante USD 1,675.000.000.

Tanba deputadu sira aprova proposta foun liu 100 durante diskusaun espesialidade,   Parlamentu Nasionál hato’o Dekretu kona-ba OJE 2022 ba Prezidente Repúblika, ho montante total USD1,949.043.291 (besik biliaun 1.95).

Ho promulgasaun husi Prezidente Repúblika, lei ne’e tama en-vigor iha loron tuir kedas publikasaun iha Jornál Repúblika, ho efeitu husi 1 janeiru 2022.

Tama iha Orsamentu Jerál Estadu 2022 reseitas no despezas Estadu nian, inklui fundus no servisus autónomus no orsamentu seguransa sosiál.

Tuir komunikadu imprensa husi Governu, Orsamentu 2022 sei tau matan ba prioridade nasionál neen: 1) dezenvolvimentu kapitál umanu ( edukasaun, formasaun profisionál no saúde);2) abitasaun no inkluzaun sosiál; 3) setór produtivu sira (agrikultura no turismu), ambiente no konetividade; 4) dezenvolvimentu setór privadu; 5) dezenvolvimentu rurál no 6) boa governasaun. (cao)

No More Posts Available.

No more pages to load.