Lú Olo Apresia Kontribuisaun FRETILIN iha Prosesu Konstrusaun Estadu, Aniceto Preokupa ho Atake Variante Omicron iha Eleisaun Prezidensial

by -935 views
Foto Midia PR

Dili (Timor Post)—Prezidente Repúblika Francisco Guterres Lú Olo apresia kontribuisaun FRETILIN nian iha prosesu konstrusaun Estadu no Nasaun no husu atu partidu polítiku sira kontinua serbisu ba bem-estar Povu nian.

Lú Olo subliña iha komunikadu ba imprensa hafoin sorumutu ho Vise-Prezidente Partidu FRETILIN Aniceto Guterres ho delegasaun iha loron 06/01/2022 hodi konsulta kona-ba markasaun data eleisaun prezidensial periodu 2022-2027.

Vise-Prezidente Partidu FRETILIN Aniceto Guterres iha sorumutuk ne’e hatete, FRETILIN laiha objesaun ba markasaun data ne’ebé Prezidente Repúblika deside tuir nia kompeténsia. Tanba ne’e, partidu polítiku sei kumpre de’it desizaun ne’ebé Xefe Estadu foti.

Haree ba variante foun Covid-19 ne’ebé hadaet tiha ona ba país viziñu, hanesan Indonézia no Australia, saúde públika eleitór sira iha prosesu eleitorál sai preokupasaun ba partidu polítiku sira. Iha enkontru ne’e, FRETILIN sujere ba Prezidente Repúblika atu integra funsionamentu saúde públika iha prosesu eleitorál:

“FRETILIN ho delegasaun aproveita enkontru ne’e hodi ko’alia mós kona-ba funsionamento sistema saúde publika iha prosesu eleitorál, FRETILIN sujere atu ajusta regras Covid-19 iha prosesu eleitoral” hatutan Sekretária Jerál Adjunta Cipriana da Costa Pereira.

Prezidente Repúblika apresia kontribuisaun FRETILIN nian iha prosesu konstrusaun Estadu no Nasaun no husu atu partidu polítiku sira kontinua serbisu ba bem-estar Povu nian.

Prezidente Repúblika apela ba partidu polítiku hotu-hotu atu kontinua kumpre nafatin medidas prevensaun ba Covid-19 tanba eleisoins prezidensiais sei akontese iha tempu ne’ebé mundu enfrenta dadaun variante foun, Omicron.

Molok dekreta data eleisaun, Prezidente Repúblika, tuir artigu 12 husi Lei númeru 7/2006, 28 dezembru, ho alterasoins susesivas ba Lei ne’e, tenke rona uluk Governu no partidus polítikus ho asentu iha Parlamentu Nasionál.

Iha 6-7 janeiru 2022, Prezidente Repúblika sei rona partidu polítiku sira ho asentu iha Parlamentu Nasionál atu hatene sira-nia hanoin kona-ba data eleisaun prezidensiál ne’ebé sei akontese, pelu menus, loron neen nulu, molok Prezidente atuál ramata ninia mandatu iha 20 maiu 2022.

Prezidente Repúblika, iha loron 6 janeiru, hala’o enkontru ho Partido Democrático (PD), Partido da Libertação Popular (PLP), Frente Mudança (FM), Frente Revolucionária de Timor-Leste Independente (FRETILIN). Aban, 7 janeiru, sei hala’o reuniaun ho Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT).

Molok halo enkontru ho líderes partidus polítikus sira-nian, Prezidente Repúblika rona tiha ona Governu, liuhusi Primeiru-Ministru, Jeneral Taur Matan Ruak no Ministru Administrasaun Estatal Miguel Carvalho.

Prezidente Repúblika rona mós Comissão Nacional de Eleições (CNE) no Secretariado Técnico de Administração Eleitoral (STAE) kona-ba preparativus ba eleisaun prezidensiál 2022.

Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022, sentru votasaun sei aumenta ba 1200. Númeru estasaun votu sei aumenta husi 1260 (iha 2018) ba 1500, iha tinan 2022.

Hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027. Nune’e, taxa partisipasaun eleitór sei sa’e iha eleisaun tuir mai.

Ho númeru sentru no estasaun barak liu, númeru votante iha fatin ida-idak sei menus. Tanba buka hamenus númeru eleitór halibur iha fatin ida, Governu Timor-Leste foti medida di’ak ida atu proteje mós ita nia ema husi vírus moras Covid-19 nian, ne’ebé sei la’o nafatin iha mundu, ho variante oioin. (cao)

No More Posts Available.

No more pages to load.