Loriku Movimentu Deklara Fó Apoiu ba Kandidatu Assanami

by -295 views
Membru hosi Movimentu Loriku (klaran) halo konferénsia imprensa iha uma vitória Assanami, hodi fo apoiu ba kandidatu ho númeru sorteiu 16 ne’e. Foto TP/mariano abi

(Reportajen Mariano Abi /Editor Mateus da Cruz)

Dili (Timor Post)-Loriku Movimentu deklara fó apoiu ba kandidatu Prezidente repúblika, ho númeru sorteiu 16, Mariano Assanami Sabino hodi sai prezidente repúblika ba períodu 2022-2027.

“Ha’u Prezidente Organizasaun Loriku Movimentu (LM) apela ba estrutura LM iha territóriu Timor laran, no diaspora atu ezerse direitu de votu no fó votu konfiansa polítiku ba Kandidatu Prezidente kompaneiru Mariano Assanami Sabino Lopes, iha loron 19 fulan Marsu 2022,” nia deklara iha Uma Vitoria Assanami, mandarin, kinta (03/03).

Nia hatete, Loriku Movimento (LM) hanesan organizasaun massa ne’ebé iha ona rekonesimento Social no Politiku iha Sociedade Timor Leste, tanto iha Nasional no mos Timor oan iha Diáspora. Organizasaun ne’e, afiliadu hosi Partidu Libertasaun Popular (PLP) tuir estatutu partidu nian rasik ho nia estrutura ne’ebe estabelese iha Municipiu 12, inklui Rejiaun Administrativa Espesial Oe-Cusse Ambeno.

Nia dehan, razaun lori movimentu deklara apoiu ba Assanami tanba PLP laiha kandidatura ba Eleisaun Prezidensial, ho ida ne’e partidu PLP fó direitu ba militante sira hodi vota ho konxiénsia.

Organizasaun Loriku Movimentu mós prontu serbisu ho organizasaun Politico sira seluk ne’ebé mak apoiu Assanami hanesan nova jerasaun, hanesan jerasaun kontinuador, hodi lori Timor-Leste ida Fraternu, unidu no solidu.

Iha sorin seluk hanesan koordenadór mobilizasaun ekipa susesu kandidatu  Assanami, Nino pereira hatete, ohin loron kandidatu PR Mariano Assanami Sabino simu tan apoiante sira, ne’ebé maka mai hosi loriku movimentu no mai ho sira nia inisiativa rasik, atu mai reforsa tan hodi fó vitória ba iha kandidatu Assanami.

“ida ne’e hanesan oportunidade di’ak, mai husi jerasaun foun hotu, ne’ebé maka sira mós haree katak, Assanami ne’e hanesan figura foin sa’e no figura ne’ebé maka determinante mós ba iha futuru nasaun ida ne’e, tanba ne’e sira deside fó votu ba kandidatu PR Assanami,” nia afirma.

Nia hatete, Lori Movimentu ne’e nia iha forsa polítiku boot tanba sira fó apoiu ona ba iha Taur Matan Ruak, hanesan prezidente PLP nian, sira nu’udar movimentu ida organizadu no sira nia estrutura ne’ebé mak kompletu.(Lee notisia seluk iha jornal Timor Post/asesu youtube Timor Post)

No More Posts Available.

No more pages to load.