Lixu Plástiku iha Tasi Problema Mundiál, “Nasaun Produtór Inklui Xina no Indonézia”

by -164 views
Sekretáriu Estadu Meiu Ambiente (SEMA), Deométrio Amaral de Carvalho

Jornalista Jaime Pires / Editór Noémio Falcão

Dili (Timor Post)—Sekretáriu Estadu Meiu Ambiente (SEMA), Deométrio Amaral de Carvalho subliña, lixu pástiku naklekar iha tasi laran ne’e problema mundiál. Iha illa Timor lixu bele mai husi nasaun seluk liuliu nasaun sira produz plástiku inklui Xina no Indonézia.

Ba jornalista sira iha Palásiu Governu, Kinta (18/11/2021) hafoin enkontru ho Primeiru Ministru, Taur Matan Ruak, Deometrio hatete, atu kombate problema ne’e, tinan oin Timor-Leste hamutuk ho Uniaun Europeia no nasaun sira seluk promove frimore internasionál foun kona-ba kombate plástiku no lixu husi rai ba Tasi.

“Plástiku sira naklekar iha tasi ibun sira ne’e la’ós de’it husi ita nia illa, tanba plástiku ne’e mundu ninia problema, tanba ne’e plástiku rohan sira ita hetan iha ita nia tasi ibun sira ne’e bele mai husi nasaun produtor plástiku sira hanean Xina no Indonézia,” Deometrio hatete.

Lixu plástiku iha tasi laran presiza tebes nasaun hotu nia atensaun sériu hodi bele proteje biodiversidade no riku soin iha tasi laran.

Iha Timor Leste Deometrio dehan, nia parte implementa estratéjia kombate lixu plástiku rua inklui hamenus importasaun no halakon total uzu plástiku iha rai laran.

“Ita hamenus importasaun mak hanesan Agua botol sira labele importa mai liu 600ml hodi fó kondisaun ba empreza nasionál sira hodi bele produz iha faze tranzisaun,” nia hatutan.

Tuir fali mak kombate plástiku to’o zero, ne’e mak labele loke fábrika plástiku iha Timor-Leste.

“Ita halo insentiva ba indústria sira iha rai laran hodi produz saku orgániku sira inklui produsaun bote ne’ebé ita nia inan feton sira produz iha knua sira,” governante ne’e subliña.

No More Posts Available.

No more pages to load.