Livre husi Sela Detensaun, Tribunál Sei Desidi Medida Koasaun ba Liborio Pereira

by -555 views
Imajen ne’e hatudu ho laran triste família no kolega sira akompaña Liborio Pereira ba kumpri interogatóriu dahuluk iha Tribunál Distrital Dili (TDD). Foto TP: Maleky Tupur

Timor Post (04/12/2020)—Hafoin kumpre sela detensaun durante oras 72, eis Prezidente Komisaun Funsaun Publika (KFP) Liborio Pereira fila hikas ba uma hanesan sidadaun baibain, maibé iha loron Sábadu (05/12/2020) tenke ba rona desizaun ba interogatóriu dahuluk iha Tribunal Distritál Dili (TDD).

Iha loron 2 fulan-Dezembru 2020  Polísia Nasionál Timor Leste liuhosi Servisu Investigasaun Krimanal ezekuta mandadu detensaun  TDD hodi detein  suspeitu tanba deskonfia involve iha kazu krime partisipasaun ekonomia no negósiu bainhira sei assume pasta nu’udar Prezidente KFP.

Maibé hafoin hala’o primeiru interrogatóriu hodi haree e medida koasaun saida mak bele aplika  tuir krime ne’ebé Ministériu públiku imputa.

“Ministériu Públiku imputa arguidu ne’e ho krime partisipasaun negósiu, tanba ita haree audiénsia ida ne’e atu haree ba medida koasaun ne’ebé mak adekuada no proporsionál atu aplika ba argidu, maibé ohin juis ordena tiha ona imediata liberdade arguidu nian, ohin nia bele fila tanba prazu detensaun oras 72 hotu ona,” esplika  Defensor Publiku, Sergio Quintas ba jornalista sira iha Tribunal Distrital Dili, sesta (04/12).

Defensor hatutan asistidu vontade bele ba uma hanesan sidadaun baibain, maibé nia iha obrigasaun aban dadeer tuku 11:30 nia tenke mai rona despaixu juis ninia medida kausaun saida mak atu aplika ba nia.

Haree medida kuasaun ida ne’e, in-adekuadu sira bele rekorre despaxu juis ninia  ne’e dentru hosi loron 15.

Enkuantu  iha promosaun ministériu públiku nia husu ba tribunal atu aplika medida kausaun ne’ebé todan uitoan, la’ós prizaun preventiva liu-liu, arguidu nia proibisaun auzénsia katak, bandu nia labele sai ba rai li’ur atu submete ba investigasaun hodi haree iha faktu duni ba krime ne’ebé mak ministériu públiku imputa ka lae.

Eis Prezidente Komisaun Funsaun Públika (KFP), Liborio Pereira detein husi Polísia Nasionál Timor Leste (PNTL) liuhusi Servisu Investigasaun Kriminál (SIK), iha loron 02/12/2020 iha nia servisu fatin atuál Ministériu Negósiu Estranjeiru no Kooperasaun (MNEK), Praia dos Coqueros, Dili.

Hafoin ba kumpri sela detensaun durante oras 72, SIK tula Liborio iha liman metin ho aljema (borgol) ba hatun iha Tribunál Distrital Dili (TDD) hodi kumpri interogatóriu dahuluk.

Observasaun haktuir, Liborio ba TDD hatais roupa detidu ho númeru 29.

Liborio kumpri prosesu legal ne’e tanba deskonfia komete kazu partisipasaun ekonomia no finanseiru iha prosesu konstuksaun ba edefísiu KFP iha Matadoru, Dili.

Kazu ne’e deskonfia involve mós atuál Ministru Obras Públika (MOP), Salvador Pires.

Julgamentu ba kazu ne’e prezide husi Juisa Maria Solana, Defensor publiku Sergio Quintas no Ministeiru publiku reprezenta husi Lidia Soares. (jmy/jxy/lyl)

No More Posts Available.

No more pages to load.