Lisaun Hosi Kopa Euro (Parte II-Remata) Haksolok Maibé ho Responsabilidade

by -248 views
Rosa Garcia, Xefe Redasaun Timor Post

Iha Jogu ida nia laran, liga ba objetivu hakerek na’in ba edisaun ida ne’e foka nafatin ba ámbitu kopa Euro. Manan no lakon liafuan rua ne’e la sees hosi kompetisaun ida. Hanesan kopa Euro 2021, jogu ne’e sai favoritu iha mundu no da’et to’o iha nasaun Timor-Leste.

Jogu ida ne’e halo ema hotu kontente, asiste hanesan divertimentu ida. Iha ema balun taru osan boot hodi apoiu de’it sira nia ekipa, liu-liu ekipa Portugal ne’ebé joga hasoru ekipa sira seluk hosi kontinente azúl ne’e.

Espiritu kontente, haksolok, diverti ne’e mós halo benefísiu ba isin lolon kada ema ida nian. Tanba tuir ema matenek na’in kona-ba saúde no psikolojia katak, isin no hanoin iha ligasaun ba malu. To’o parte rua ne’e metin no labele atu fahe. Iha mundu siénsia, relasaun parte rua hahoris sanak siénsia foun, ho naran psiko-neuroimunologi (PNI). Siensia ne’ebé halo esplorasaun ba relasaun hanoin, kakutak no sistema imunidade ba isin.

Iha peskiza interesante ida hosi PNI ne’ebé públika ona iha New England Journal of Medicine, iha ne’ebá siénsia ida halo analiza ba voluntáriu lubun ida hodi uza ai-moruk rega ba inus. Iha ai-moruk ne’e kontamina ho virus balun ne’ebé sei halo ema isin manas kaman, no restu kontamina de’it ho masin. Voluntariu sira ne’ebé sai ejemplu ba peskiza lahatene kona-ba kontaminadu saida mak sira hetan, rezultadu mak sira ne’ebé tauk no hanoin barak, stress, fasil hetan moras inus ben (flu) no sintoma flu. Diferente ho sira ne’ebé laiha hanoin oin-oin, sira bele hasoru no kontra virus ne’e.

Konklusaun hosi ne’e atu hatete, ema ne’ebé haksolok, kontente iha influensia ba isin, liuliu ba iha imunidade isin nian. Kuandu kontente hela de’it, ksolok ne’e halo nia imunidade aumenta, isin forte hodi hasoru moras no virus oi-oin.

Liga ba liafuan haksolok, ita hotu foin asiste iha dia 16 Juñu, bainhira jogu entre Portugal ho Hungaria, ne’ebé halo Portugal manan 3-0, ema hotu kontente, liuliu supporter sira iha Timor-Leste. Maioria labarik hosi idade 7 ba to’o 25, mak sai fanatizmu los ba ekipa Portugal, liuliu jogadór Cristiano Ronaldo.

Foin hatama de’it golu ida, ema hotu haklalak, kontente, haksoit, to’o haluha tiha saida mak iha sira nia sorin-sorin, balun to’o fokit ai-funan sira, balun tebe kaderia, balun fokit fiu ne’ebé liga ba monitor, balun fali apita motor no karreta halo makas, halai hale’u Dili hodi tula malu ho motor ho ema na’in 3 la uza kapasete, balun to’o la kontrola–an to’o tuku kolega ne’ebé hamriik iha nia sorin. Hahalok sira ne’e parte ida hodi espera ida-idak nia ksolok.

Los duni kontente ne’e laiha limitasaun, maibé kada ema ida tenke hatene saida mak responsabilidade, satan joven, foinsa’e sira. Joven mak futuru nasaun ida ne’e nian, aprende ona hodi halo balansu ba pasu, espresa no deside, lala’ok sira ne’e tenke ba hamutuk ho responsabilidade. Tanba bainhira la ba hamutuk ho responsabilidade bele hasoru problema oi-oin ne’ebé bele kauza ba isin lolon.

Tanba ne’e, hakerek na’in hakarak rekomenda ba joven sira, liuliu fans Portugal, bainhira iha jogu tuir mai iha dia 19 oras Europa no dia 20  oras Timor- Leste, ba dahuluk tenke prepara-an hodi simu rezultadu jogu nian, tantu rezultadu ida aat no di’ak.

Segundu, karik ekipa ne’ebé ita boot sira apoiu manan, bele espresa, maibé ba ho responsabilidade. Bainhira atu uza motor ba pawai haleu sidade, favor uza kapaseti, motor nia kapasidade tula de’it ema boot rua, labele inventa hodi tula ema liu rua. Halai nei-neik, bainhira hakarak gas, aselera ou apita ba buka rai mamuk dook hosi komunidade nia uma, nune’e labele estraga ema nia hakmatek. Halai motor ou kareta karik nei-neik deit nunee kontinua haksolok iha rai deit.Kontrola Hahalok haksolok tuir nia koridor, nune’e evita parte Polisia hodi tun to’o halo intervensaun.

Bainhira atu kontente ou haksolok, koko kontrola-an, hateke ba sorin sorin, nune’e bainhira haksoit karik labele estraga sasán sira iha sorin sorin. Los duni katak haskolok ne’e importante, maibe labele tanba de’it razaun haksolok ne’ebé demais ita koinsidénsia ba haterus fali ema seluk.

No More Posts Available.

No more pages to load.