Lider Bankada hili Loron 4 Setembru hadi’a Meza Parlamentu Nasional

by -146 views

Timor Post (18/08/2020)- Loron 4 Fulan Setembru hanesan loron Timoroan Rona Rezultadu Ukun Rasik Aan. Maski loron ne’e iha valor istóriku maibé liu hosi reuniaun lider Bankada iha parlamentu nasionál deside loron ne’e hodi hatuur hikas meza parlamentu ne’ebé harahun iha loron 19 Maiu 2020.

Sekretaria Meza Parlamentu Nasionál, deputada Lidia Norberta, hatete iha reuniaun lider bankada, hotu-hotu deside hatuur hikas meza parlamentu iha loron 4 fulan Setembru.

“Loron refere marka mós loron istória ida ne’ebé timoroan hotu rona rezultadu konsulta popular nian” Lidia Norberto informa ba Jornalista sira iha PN, Tersa (18/8).

Norberta hatutan lider bankada ko’alia mós kona ba sesaun solene, atu abertura sesaun lejizlativa datoluk nian iha loron 15 Setembru, tanba tempu resesu deputadu sira nian remata iha loron 14 Setembru.

“Ba sesaun lejizlativa datoluk nian ne’ebé sei hala’o sesaun solene ne’e Prezidente repúblika mós sei marka prezensa” adianta sekretaria.

Deputada Fretilín friza liután katak, data 4 Setembru ne’e fixa ona ba parlamentu atu hatuur fila fali meza foun.

Enkuantu Meza Lulik Uma Magna Parlamentu Nasionál harahun hosi deputadu V Lejizlativa iha loron 18-19 fulan Maiu 2020.(Jornalista Julio Salinas Soares).

No More Posts Available.

No more pages to load.