Lere Sei ba Hamutuk ho Fretilín Hodi Halakon Horta iha Eleisaun Segunda Volta

by -7.478 views
Koordenador Jerál Kampaña Kandidatu Prezidete Repúblika, Francisco Guterres Lú Olo, José Manuel 'Nakfilak'. Imajen Espesial

(Reportajen Jaime Pires/Editor Mateus da Cruz)

Dili (Timor Post)- Koordenadór Jerál Kampaña Kandidatu Prezidente Repúblika Francisco Guterres Lú Olo, José Manuel Fernandes ‘Nakfilak’ hatete, Tenente Jenerál reformadu, Lere Anan Timur, sei ba hamutuk ho Fretilín hodi fó vitória ba Kandidatu Prezidente Repúblika, Francisco Guterres Lú Olo, iha segunda volta.

Nia dehan, Jenerál Lere nanis kedas nia tau farda deklara ona dehan nia ema Fretilín, agora mak dehan nia la’ós fali Fretilín ne’e ema seluk mak dehan, maibé sira  nunka hatete ida ne’e.

“Tanba ne’e nia sei kontinua ema Fretilín, no nia sei mai hamutuk ho ami Fretilín hodi fó vitória ba Kandidatu Prezidente Repúblika, Francisco Guterres Lú Olo,” nia deklara liuhusi konferénsia imprensa ne’ebé mak relaiza iha, Luz Clarita Bairru Formoza, Kinta (24/03).

Nia hatete, iha primeiru rounde ne’e militante Fretilín fahe ba rua tanba, kandidatu Lere Anan Timur iha, maibé agora segundu rounde ne’e kandidatu Fretilín mak uniku de’it ona, entaun sei garante militante sira sei fila hotu mai vota ba Lú Olo.

“Signifika sira hatene sira nia kandidatu mak se, tanba laiha tan kandidatu rua, no agora aprosimasaun kontinua la’o, militante sira mós sei lori konxiénsia rasik hodi lori votu mai fó vitória ba Kandidatu Francisco Guterres Lú Olo,” esplika.

Tanba ne’e ekipa susesu Lú Olo agora kontinua halo aprosimasaun ho Lere oinsá bele hamutuk ho Fretilín hodi lori vitória ba Lú Olo.

Alende ne’e nia dehan, aprosimasaun ba kandidatu sira seluk mós agora la’o hela no informasaun pozitivu katak kandidatu sira iha primeiru rounde ne’e barak maka iha vontade di’ak hakarak atu koopera.

“Jenerál Taur mós sei hamutuk, tanba governasaun ida ne’e ita bele dehan Jenerál Taur Matan Ruak nian, entaun nia sei hamutuk hodi kontra ema ida ne’ebé mak hakarak mai disolve Parlamentu ne’e,” hakotu.

 

 

 

No More Posts Available.

No more pages to load.