Lere Rejigna husi F-FDTL Sei husu Kartaun Nu’udar Membru CCF no Kandidatu ba Prezidente Repúblika

by -3.159 views
Tenente Jeneral Lere Anan Timur

Jornalista Jaime Pires / Editór Noémio Falcão

Dili (Timor Post)—Tenente Jeneral Lere Anan Timur afirma, bainhira rejigna husi kargu Xefe Estadu Maior Jeneral FALINTIL-Forsa Defeza Timor Leste (F-FDTL), sei ba husu kartaun nu’udar membru Comite Central FRETILIN (CCF) no deklara nia kandidatura ba Prezidente Repúblika periodu 2022-2027.

“Ohin rejigna, aban sai, ha’u ba loos ha’u nia uma Comite Central FRETILIN. Eiii imi fó ha’u nia kartaun. Kartaun FRETILIN ninian. Imi be túr iha ne’e imi laiha direitu hanesan ha’u. Ha’u, eleze ha’u membru Comite Central iha hudi-tahan okos, haan hudi-kain, haan koto-moruk nia tahan, maka eleze ami na’in-sia ba membru Comite Central da FRETILIN, na’in-ualu mate hotu ona,” Lere Anan Timur subliña hafoin hasoru malu ho Prezidente Repúblika Francisco Guterres Lú Olo, iha Palásiu Prezidensiál, Bairro-Pité, Dili.

Antes ne’e Lere deklara nia intensaun kandidatura ba Prezidente Repúblika. Nia dehan, Xefe Estadu nu’udar kareira ikus ba nia.

Maske nune’e, tuir estatutu militár artigu-90, governu iha biban maizumenus fulan tolu prepara lideransa foun ba okupa kargu ne’ebé mamuk iha F-FDTL. Tanba ne’e, Lere konsideradu viola regra ne’e tanba seidauk aprejenta ofisialmente karta rejignasaun maibé deklara ona nia intensaun polítika ba públiku.

Entretantu tuir informasaun ne’ebé Timor Post assesu husi Gabinete Xefe Estadu Maior Jeneral F-FDTL haktuir,  offisialmente Lere sei hatama karta rejignasaun ba Ministru Defeza (MD), Filomeno Paixão de Jesus iha loron Tersa (18/01/2022).

Governu lideradu Primeiru Ministru Taur Matan Ruak sei konsidera deklarasaun Lere kona-ba rejignasaun hanesan komunikasaun baibain.

Ministru Prezidensiál Konsellu Ministru, Fidelis Manuel Leite Magalhães subliña, bainhira Lere hili duni dalan ne’e tuir lei sei hatoo uluk karta ba Ministru Defeza.

“Informasaun legal kona-ba ida ne’e agora iha hanesan komunikasaun ka kontestu baibain de’it, karik tebes Tenente Jeneral Lere sei fó informasaun ba Ministru Defeza, depois Ministru Defeza sei hato’o ba Primeiru Ministru, sei mai tan iha Konsellu Ministru mak sei komunika ba Prezidete Repúblika hanesan Komadante Supremu,” Fidelis haktuir ba Jornalista sira hafoin reuniaun ho Prezidente Parlamentu Nasionál, Aniceto Guterres, iha Parlamentu Nasionál, Kinta (13/01/2022).

Fidelis dehan, nia labele adianta prosesu saida mak governu hala’o no desizaun sira kona-ba Xefe Estadu Maior Jeneral foun F-FDTL.

“Agora kona-ba desizaun saida ha’u labele adianta ba ita boot sira tanba ne’e asuntu ida ne’ebé mak presiza ministru defeza, primeiru ministru, konsellu ministru deskute klean hafoin haruka ba Prezidete Repúblika,” nia hatutan.

Antes ne’e Tenente Jeneral Lere Anan Timur ba Jornalista sira subliña, sei rejigna-an hodi hala’o fali vida sivíl.

“Naran ida atu troka ne’e ha’u seidauk adianta lai, mais automatikamente ha’u nia vise (Maijor Jeneral Falur Rate Laek), labele ema seluk, se vise la avansa entaun vise mós sai, vise ba fali vida sivíl,” Lere afirma iha komponente Navál Hera, Kuarta (12/01/2022).

No More Posts Available.

No more pages to load.