Lere Duni Membru Fasilita Movimentu Ilegál, “PSHT iha Grupu Rua”

by -10.506 views
Imajen ne’e hatudu Tenente Jeneral Lere Anan Timur ba hasoru Prezidente Repúblika Francisco Guterres Lú Olo. Foto Gabinete PR

Jornalista Jaime Pires / Editór Noémio Falcão

DILI (Timor Post)—Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Lere Anan Timur duni sai membru ne’ebé mak fasilita movimentu ilegál iha fronteira no prosesa tuir lei.

“Kuandu iha ha’u nia fatin hanesan Membru F-FDTL ida mak dehan fasilita ema tama sai ilegal, no kaer toman ha’u duni sai kedas,” Lere afirma kestaun ne’e relasiona ho informasaun katak membru Polísia Nasionál Timor Leste (PNTL) – Unidade Polísia  Fronteira (UPF) fasilita membru arte marsiál PSHT ba hasa’e sintu liuhusi dalan ilegál iha Atambua-Indonézia.

Lere hatutan, komandu tenke halo investigasaun ba membru UPF ne’e tanba bainhira loos duni halo atividade ne’e kontra juramentu forsa no polísia nian.

Entretantu Lere mós kestiona Sekretáriu Estadu Juventude no Desportu (SEJD) reativa ona arte marsiál maibé laiha lei ba kontrolu nian.

“Arte marsiál kontinua ilegal ba Atambua ne’e, ha’u bele dehan Ministeriu relevante hanesan Juventude Desportu tenke aperta ona, labele toba, tanba reativa fila fali arte marsiál sira depois laiha lei ruma atu kontrola sira,” Lere subliña hafoin informa situasaun defeza iha rai laran ba Prezidente Repúblika Francisco Guterres Lu-olo, Kuarta (11/08/2021) iha Palásiu Prezidensiál Bairro-Pité, Dili.

Lere dehan, juventude sira ne’e ninia fiar hanesan kultura ba iha arte marsiál. Tanba ne’e, tuir nia, se sira la bá sa’e tiha iha sorin bele hetan moras ka dezastre ruma karik, entaun sira hakarak ka lakohi tenke ba duni hodi hasa’e fita iha sorin ne’ebá.

“Ne’ebé loloos ne’e sira mós sala governu toma konta ba ida ne’e hanesan Despirtu Juventude ne’e mós sala tanba sira la kontrola no la halo lei rigor ida ba arte marsiál sira maibé reativa fali ona”, tenik Nia.

Lere dehan, arte marsiál Persaudaran Setia Hati Terate (PSHT) ne’e foin dadaun mak halo Kongresu maibé haree hanesan sira iha grupu rua, tanba sira ne’ebé mak uluk hanesan veteranu ona ne’e hatene maibé sira foun foin tama ne’e mak dezkontroladu maibé ita fó sala nafatin ba Ministeriu ne’ebé mak Roma konta ba ida ne’e.

Nia mós dehan, kona-ba atu aumenta seguransa iha fronteira, atu forsa no polísia ba hotu mós sei la rezolve problema tanba fatin iha fronteira netmamuk barak tebes, tanba neyatu rezolve problema ida ne’e presiza mós ema hotu liuliu sira hela b suku Fronteira ne’e ninia konsiensia.

Atu hakotu Lere deklara, presiza mós halo investigasaun klean ba polísia no forsa sira ne’ebé mak halo seguransa iha fronteira ne’e, tanba sidadaun sira ne’e husi Timor ba la kaer maibé tootona iha Indonézia mak ema kaer fali, tanba ne’e nia husu halo investigasaun ba parte seguransa sira iha fronteira ne’e. (Lee notísia seluk iha Jornal Timor Post)

No More Posts Available.

No more pages to load.