Lere Anan Timur: “La Ba Prezidente Mos Ha’u ba Ona Vida Sivíl”

by -2.447 views
Tenente Jeneral Lere Anan Timur hala'o diskursu iha Serimonia Selebrasaun Loron Polisia Militar ba-dala 17, iha Kuatel Jeral, Kintal Boot, Dili. Foto Espesial

Dili (Timor Post)—Tenente Jeneral Lere Anan Timur hatete, nia aprejenta ona karta rejignasaun ba governu no iha tempu badak nia husik kargu Xefe Estadu Maior Jeneral FALINTIL-Forsa Defeza Timor Leste (F-FDTL) hodi ba vida sivíl.

“Ba prezidente mos ha’u ba ona vida sivíl, la ba prezidente mos ha’u ba ona vida sivíl, mas husu ba imi rona malu, fi’ar malu i apoiu malu. Ida ne’e mak importante,” Lere subliña iha nia intervensaun iha serimónia selebrasaun loron Polísia Militár (PM) ba-dala 17, iha Kuartel Jeral, Kintal Boot-Dili, Segunda (17/01/2022).

Lere hatete, ba vida sivíl nia konsiente prezidente repúblika mak nu’udar kareira ikus ba nia, bainhira laiha manobra polítika iha prosesu sira ba eleisaun prezidensiál ne’ebé sei hala’o iha loron 19 Marsu 2022.

Nia hatutan, bainhira nia hala’o fali vida polítiku mos sei defende forsa armada nia interese no bem estar.

“Ha’u komandante tinan barak ona. Ha’u la’ós ko’alia polítika atu sa’e ka tún, para imi abele iha nafatin nakukun laran,” Lere hatete.

Lere subliña, nia fiar katak sé de’it maka ba troka nia fatin kontinua nafatin sá di’ak mak durante ne’e nia halo ba instituisaun defeza nasionál ne’e ba oin nafatin.

“Komandante atu komanda, komandante atu garante, komandante atu hadomi. La’ós atu hasoru problema de’it,” Lere hatete.

“Hadomi imi nia rain, hadomi imi nia povu,” Lere tatoli ba membru PM tomak atu kotinua serví nasaun no povu ho profesional.

“Ha’u husu atu uza imi nia domin duke uza imi nia forsa. Uza nafatin prinsípiu no valores FALINTIL nian,” Lere hatutan.

Nia mós husu ba forsa sira atu lalika mete polítika, klaru katak seidauk iha lei atu forsa sira labele ba vota maibé tenke mantein nafatin katak to’o eleisaun maka ida-idak ba vota ho nia konsiénsia rasik.

Entretantu Ministru Defeza Filomeno Paixão informa, simu ona karta rejignasaun husi Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Jeneral Lere Anan Timur.

Lere hatama karta rejignasaun iha loron Segunda (17/01/2022).

“Karta rejignasaun sei iha ha’u seidauk hato’o ba konsellu Ministru, aban mak sei hato’o ba Konsellu Ministru hodi tau ajenda diskusaun,” Filomeno ba Jornalista sira iha Kuartel Jeral F-FDTL, Fatuhada,-Dili hafoin simu karta rejignasaun husi Lere.

Tuir regra, Lere hato’o karta rejignasaun ba Ministru Defeza sei hato’o ba Primeiru Ministru no halo diskusaun iha Konsellu Ministru mak haruka ba Prezidete Repúblika hanesan Komadante Supremu foti desizaun hafoin rona Konsellu Supreior Defeza no Siguransa (KSDS).

Lere Anan Timur kompleta ona mandatu ba dala rua no hetan estensaun dala rua tutuir malu. Desizaun ne’ebé Lere foti, baziea ba nia deklarasaun rasik katak, posibilidade hafoin nia rejigna husi Xefe Estadu Maior Jeneral F-FDTL, sei kandidatu ba prezidente repúblika nu’udar kareira ikus ba nia bainhira povu fó fiar liuhusi eleisaun prezidensiál. (cao)

No More Posts Available.

No more pages to load.