Lembra Loron Invazaun Indonézia: Memorializa Istória Hodi Konstrui Estadu Direitu Demokrátiku

by -775 views
Foto Espesial

Jornalista Estajiáriu Mariano Do Santos / Editór Noémio Falcão

Dili (Timor Post) — Loron 7 Dezembru nu’udar loron istóriku ba povu Timor Leste. Iha loron ne’e Tentara Nasional Indonesia (TNI) hahú halo invazaun tama iha territóriu hodi duni no oho timoroan sira.

Lembra hikas loron ne’e, Partidu Demokrátiku (PD) organiza semináriu nasionál iha Lasama Training Center (LTC) iha Sede Nasionál PD ho tema Memorializa Istória hodi Konstroi Estadu Direitu Demokrátiku.

Diretór Ezekutivu LTC ho Sekretáriu Ezkutivu PD, Bento Alberto Carlos iha abertura semináriu ne’e subliña, tinan 46 liuba timoroan sira tenke simu konsikuensia ida ne’ebé moruk tebes, maibé liu tiha tinan 24 nia laran timoroan sira konsege liberta-an. No agora ba oin oportunidade di’ak tebes ba timoroan tomak atu hamutuk duni mehi ba moris di’ak.

Bento dehan, LTC moris foku ba edukasaun naun formal oinsá halibur foinsa’e sira kontinua apriende tanba Timor Leste ba oin ho dezenvolvimentu lais no kualidade presiza tebes ema matenek.

LTC loke formasaun lian Ingles, Português, Administrasaun no Finansas.

Iha okajiaun, Sekretáriu Ezkutivu Partidu Demokratiku (PD) Jacinto Barros Gusmão subliña, invazaun Indonézia tanba mundu konsidera Timor Leste hanesan rai ne’ebé komunista, maibé mós objetivu husi invazaun ne’e tanba rai Timor iha riku soin barak.

Nia subliña, timoroan sira nia luta ba libertasaun nasionál lori tempu naruk tebes, terus no susar oioin, mate to’o agora barak mak la hetan ruin. Tanba ne’e, timoroan sira hanesan mate restu tenke tane aas unidade nasionál hodi foku ba dezenvolvimentu nasionál.

“Hau hatene katak ita nia lutador sira mos uluk mai husi joven sira, joven sira hamrik funu hasouru Indonézia, dala ruma sira ba túr ho Prezidenti Suharto (Prezidente Repúblika Indonézia / matebian),  maibé ho espíritu hakarak ukun rasik aan,” Jacinto hatete.

Joven sira tenke kaer metin nafatin valór eroi sira mate ona no balun sei moris hodi hasai povu husi ki’ak no mukit.

“Sira ohin liberta rai ida ne’e, joven sira tenke sai lutador no kontinuador oinsá atu luta ba povu, hodi povu moris di’ak ba iha tempu tuir mai,” Jacinto subliña.

No More Posts Available.

No more pages to load.