Lampu Tráfegu Komoro Kontinua Avaria

by -159 views
Ahi trafiku ne'ebé aat iha Delta Comoro

(Editor Orlando Oki)

DILI (Timor Post) – Lampu tráfegu iha dalan protokolu kapitál Dili, area kruzamentu Komoro liga Delta kontinua avaria seidauk hetan manutensaun hosi parte kompetente.

Observasaun Timor Post, Sesta (07/05), dadeer lampu tráfegu iha kruzamentu protokolu, entre Timor Plaza no supermerkadu Lider nia oin hamosu engarrafamentu kuaze minutu balu, tanba impaktu hosi lampu ne’ebé avaria.

João Manuel, hanesa motorista hatete lampu iha area ne’e avaria kleur ona mak to’o agora seidauk hadi’a.

“Lampu ne’e ita haree aat iha fulan Maiu nia laran, se la sala to’o agora governu sira sei fokus ba situasaun Covid-19, sira la haree katak ida ne’e fó ameasa ba ema nia vida,” motorista ne’e preokupa.

Tanba ne’e, nia husu ba instituisaun kompetente atu responsabiliza hodi halo manutensaun ba lampu tráfegu ne’e.

Entretantu, antes ne’e Komandante Polisia Seksaun Tránzitu Munisípiu Dili, Inspetór Xefe Domingos Sarmento Gama, hato’o ona nia preokupasaun ba Timor Post iha edifísiu Komandu PNTL Munisípiu Dili, Segunda (26/04) lokraik.

Nia dehan, Parte Unidade Tránzitu haruka ona karta ba iha Diresaun Nasionál Transporte Terestre (DNTT), maibé seidauk iha resposta atu kontrola.

“Ida ne’e la’ós kompeténsia polisia mak halo kontrolu, maibé parte sira iha DNTT, sira tenke haree duni, ita haruka karta mós seidauk resposta,” dehan Komandante tránzitu.

Tuir nia katak, ida ne’e perigu tebes ba motorista sira, tanba ne’e husu atu iha kontrolasaun kuandu lori motor ho karreta nune’e evita risku dezastre tráfegu.

“Ba kondutór sira husu atu halai motor no karreta kalma, tanba iha situasaun sira hanesan ne’e bele akontese dezastre ne’ebé ita la espera,” nia apela.

Nia husu mós ba DNTT, atu normaliza lalais kondisaun lampu sira ne’e, tanba lampu iha area balu at kuaze fulan barak, hanesan iha kruzamentu Audi’an besik ANZ ida ne’e mós avaria, no presiza normaliza.

“Kona-ba asidente, ita seidauk rejistu hosi dezastre kona-bá impaktu hosi avariasaun lampu, maibé iha semana rua kotuk parte tránzitu foin rejistu kazu soke ida iha area Komoro nian ne’ebé rezulta vítima hetan kanek grave iha ain no liman,” nia hatete.

Tuir observasaun Timor Post nian, katak total lampu tráfiku ne’ebé avaria hamutuk 6, iha Audian 2, no Komoro 4, hosi ne’e sempre hamosu engarrafamentu (macet), liuliu iha parte dadeer no loro-kraik.(Lee notísia seluk iha jornál Timor Post)

No More Posts Available.

No more pages to load.