Laloran Boot Obriga Kapitaun Ró Nakroman Desidi Fila iha Tasi Klaran

by -63 views

Timor Post (21/12/2020)—Ró Nakroman labele hala’o viajen to’o Oekusi tanba laloran boot iha tasi parte Likisá nian. Nune’e, kapitaun desidi fila fali ba Portu Dili no hatun pasajeirus sira ne’ebé iha ró laran kuaze atus tolu.

Ró Nakroman sai husi Portu Dili atu ba Oekusi iha segunda lorokraik, no tuir oráriu normal to’o iha Portu Mahata-Oekusi dadersan.

Adelia Imaculada da Rosa nu’udar pasajeirus ida ba Timor Post haktuir, iha ró laran nia toba hela, maibé derepente rona avizu katak ró tenke fila fali ba Dili tanba laloran baku maka’as.

“Ami hatene de’it maka ohin laloran maka’as,” Adelia subliña no lahatene kona-ba problema seluk ne’ebé akontese ba Ró Nakroman hodi kapitaun desidi la kontinua viajen ba Oekusi.

Fila fali to’o iha Portu Dili, obrigadu pasajeiru sira tenke tún husi ró no fila ba ida-idak nia uma hodi hein viajen iha loron ikus.

Pasajeirus sira preokupa tebes ho situasaun ne’e, tanba ró atraka hikas iha Portu Dili iha ona kalan tuku sia liu, udan tau suviska no laiha transporte públiku hodi tula sira.

To’o notísia ne’e públika Jornalista Timor Post seidauk hetan konfirmasaun ho kapitaun ró no autoridade sira iha portu kona-ba akontesimentu ida ne’e. (cao)

No More Posts Available.

No more pages to load.