Zeferina Mate Restu Masakre Santa Kruz Hakotu Iis

by -769 views
Saudoza Zeferina dos Santos

Dili (Timor Post)—Zeferina dos Santos nu’udar mate restu Masakre Santa Kruz 1991. Iha imejen ne’ebé viral, Zeferina foinsa’e falun ho raan iha momentu ne’eba hatudu nafatin aten brani iha inimigu nia oin.

Imajen ne’e Saudou Max Sthal mak hasai iha tinan 1991-Masakre Santa Kruz

Ho terus no susar hotu durante tempu rejisténsia, iha tempu ukun rasik-an, goja ka lae, Zeferina rasik maka sente, maibé iha loron Segunda (20/12/2021) dader rona notísia triste katak Zeferina hakotu ona iis.

Zeferina hakotu iis husik hela laen kaben ho oan na’in-7.

Prezidente Komité 12 Novembru, Gregório Saldanha ba Timor Post hato’o sentidu kondolénsia klean ba faluk, oan no família romak ne’ebé lakon Zeferina.

“Deskansa ho hakmatek ba materestu massakre Santa Kruz,  Saudoza Zeferina,” Gregório hatete.

Zeferina nia mate lakon boot ida, maibé tanba Maromak nia hakarak, nu’udar ema laiha forsa atu sata.

Masakre Santa Kruz akontese bainhira foinsa’e sira lori aifunan ba kari ba Saudozu Sebastião Gomes nia mate tanba hetan oho husi militar Indonézia iha Igreja Motael.

Husi Igreja Motael to’o iha Semitériu Santa Kruz, militar no polísia haleu no hahú tiru joven sira barak mak mate.

Saudoza Zeferina bainhira sei moris haktuir istória bainhira iha Santa Kruz, forsa sira hahú tiru no sira halai rungu-ranga, nia monu ba rai raan fakar no sente iha duni ona mate laran. Kilat kontinua tarutu no ema barak mak monu tan ba nia leten. (cao)

No More Posts Available.

No more pages to load.