Lakon Amigu Boot no Kompañeru da Luta Jorge Sampaio, Lú Olo Hakerek Karta ba Marcelo Rebelo

by -308 views
Imajen ne’e hatudu Jorge Sampaio hala’o vizita mai Timor Leste. Foto Espesiál

DILI (Timor Post)—Prezidente Repúblika, Francisco Guterres Lú Olo lori naran Povu Timor-Leste no ninia-an rasik, hakerek karta ba ninia omologu Prezidente Repúblika Portugéza Marcelo Rebelo de Sousa hodi hato’o sentidas kondolénsias ba família enlutada no portugeza ne’ebé lakon Jorge Sampaio.

Lú Olo hatete, Timor-Leste lakon nia amigu boot no kompañeru da luta, Jorge Sampaio, ne’ebé hamutuk ho Timor-Leste iha momentu sira difísil tebetebes.

Liuhusi karta komunikadu ba imprensa ne’ebé Timor Post assesu husi Palásiu Prezidensiál Nicolau Lobato, Díli, 11 setembru 2021, Xefe Estadu subliña, iha momentu desizivu ba vida rai no povu Timór, ema ida estraordináriu ne’ebé kombina intelijénsia/matenek ho fuan, ema ida nakonu ho aksaun. Jorge Sampaio nu’udar ezemplu polítiku ida ne’ebé hala’o nia knaar ho seriedade no koerénsia. Nia sempre sai hun ida ba inspirasaun ba ema hotu ne’ebé hakarak serve tan kauza públika ida.

Prezidente Repúblika hatutan, Jorge Sampaio nu’udar fígura markante no inkontornável istória Portugal, lutador kolen-laek ba liberdade no ba demokrasia. Estadista ida integru no umanu, iha kauza hotu-hotu ne’ebé nia hola parte hatudu nia néon boot luta ba justisa, ba dame, ba liberdade no ba diálogu entre sivilizasoins.

Ba ninia omologu, iha momentu tristeza ne’e, Prezidente Repúblika hato’o gratidaun no rekoñesimentu ba buat hotu ne’ebé Jorge Sampaio halo ba Timor-Leste bainhira sai Sekretáriu Internasionál ba Partido Socialista, nu’udar Sekretáriu-Jerál Partido Socialista, nu’udar Prezidente Kámara Munisipál Lisboa no nu’udar Prezidente Repúblika Jorge Sampaio hamutuk ho Timor-Leste iha momentus ne’ebé difisil liu.

Bainhira Timoroan na’in-rua simu Prémiu Nobel da Paz,  iha Dezembru 1996, Jorge Sampaio asiste serimónia atribuisaun prémiu iha Oslo, Noruega.

“Iha tempu ne’ebé nia hatene katak Indonézia fó sinais sei muda nia pozisaun iha relasaun ho Timor-Leste, Jorge Sampaio, nu’udar Xefe Estadu, hametin kedas nia atividade ba kauza Timor-Leste, hatudu dala ida tan nia koñesimentu klean kontestu internasionál no nia vizaun estratéjika,” Prezidente Repúblika hatete.

Iha 1999 hafoin referendu ne’ebé nakonu ho violénsia, Jorge Sampaio sai fulan insónia no serbisu makaas liután, iha kalan no loron atu hases tragédia ba timoroan sira. “Kauza Timor nian halo Sampaio tanis,” Prezidente Repúblika hatete.

Timor-Leste haksolok tebes no orgullu ho prezensa Jorge Sampaio nian iha Díli, asiste isar Bandeira no rekoñesimentu internasionál ba Estadu Timor-Leste, iha 20 maiu 2002.

Parlamentu Nasionál atribui títulu Cidadão Honorário da República Democrática de Timor-Leste ba Jorge Sampaio iha nia vizita ikus mai Timor-Leste iha 2006.

Iha 2016, Estadu Timor-Leste rekoñese Jorge Sampaio nia solidariedade no apoiu ativu iha luta ba independénsia país nia ho Grande Colar de Ordem de Timor-Leste, rekoñesimentu ida aas liu iha Timor-Leste.

“Ema boot sira  hanesan nia nunka mate tanba nia legadu sira sei hela metin husi jerasaun ba jerasaun,” Prezidente Repúblika hatete. (*/cao)

No More Posts Available.

No more pages to load.