Laiha Dalan Vítima –Arguidu Taka Krime VD

by -38 views
Foto Ilustrasaun

DILI (Timor Post) —Vítima no arguidu labele deside dada ka taka prosesu kazu krime ofensas Integridade fizika Simples, ho nia natureza violensia doméstika, tanba lei la fó dalan.

“Tuir lei, ba krime violensia doméstika lei la fó dalan atu taka, maski parte rua iha ona konkordansia, ka di’ak malu,” dehan Juis Prosesu Ivan Antonino, iha sala julgamentu Tribunal Distrital Dili (TDD), Segunda (26/07), hafoin realiza prosesu krime ida ho natureza públiku ba lei kontra violensia doméstika.

Juis prezide kazu refere, nia halo esplikasaun tanba iha prosesu kazu ne’e arguidu ho inisial GSP ho vitima AL nu’udar fen la’en, hakarak taka kazu ho razaun di’ak malu.

Tuir Juis Ivan, katak kazu sira seluk hanesan ofensas integridade fizika simples, konsidera semi públiku tanba laiha ligasaun família rasik ka ran, mak tribunál bele autoriza vitima dada prosesu taka, tanba vítima iha lejitimidade ba ida ne’e.

Maibé ba krime ho natureza públika, hanesan violensia doméstika, arma branka, violensia seksual, krime omesidiu, ne’e lei lafo dalan atu dada ka taka prosesu.

Ho nune’e, kuandu rona esplikasaun juis nian, arguidu ba krime VD arrepende kedas iha tribunál, ho promete sei la repete asaun krime ba vítima

Arguidu rekoñese katak, hahalok ne’ebé nia hatudu hasoru lezada hanesan krime.

“Ha’u arrepende ba hahalok ne’e, ha’u mós hatene katak hahalok ne’ebé halo hasoru ferik-oan ne’e krime,” arguidu deklara iha sala julgamentu laran.

Akuzadu ne’e promote iha tribunál laran, katak ba futuru sei la halo tan krime hanesan hasoru lezada.

Entretantu, hare ba hahalok arrependimentu ne’e, lezada fó perdaun kedas ba arguidu.

“Ha’u fó perdaun ba nia (arguidu), tanba hanesan laen,” dehan arguidu nia kaben.

Enkuantu, tuir faktu ne’ebé Ministériu Públiku aprezenta ba tribunál, hatete arguidu ho lezada moris hanesan fen ho la’en hosi tinan 2019, hosi sira nia moris hamutuk nee hetan oan na’in feto ida.

Katak iha loron 27 fulan Agostu 2020, iha suku Komoro, Lezada foin fila hosi hospital atu foti ropa sai, nune’e arguidu nervozu hit lezada riba ba rai, halo lezada monu hetan kanek iha ain tuur parte karuk.

Konsekuénsia hosi hahalok ne’e, halo lezada sente moras iha ain tanba bubu.

Tanba ne’e Ministériu Públiku, nu’udar na’in ba asaun penal, akuza arguidu ba krime ofensa integridade fízika simples tuir artigu 145, agrava ho lei violénsia doméstika ne’ebé hatuur iha númeru 2 no 3 artigu 35.

Ho faktu sira ne’e, Ministériu Públiku submete iha alegasaun husu atu kondena arguidu ho pena multa.

Enkuantu, parte defeza kontinua defende arguidu, tanba haree ba arguidu nia arrependimentu iha tribunál, husu tribunál atu aplika Pena admoestrasaun (teguran) katak ba futuru la bele rezolve problem ho fíziku entre fen ho la’en.

Audiénsia ne’e prezide hosi juis prosesu, Ivan Antonino, parte ministériu públiku reprezenta prokuradór titular Luis Hernâni Rangel, no parte defeza hosi defensór públiku Sebastião Amado. (jxy)

No More Posts Available.

No more pages to load.