La’en Oho Feen tanba Haksesuk Malu Selu Oan Nia Eskola

by -12.879 views
Suspeitu ACP. Foto Espesial

Jornalista Jaime Pires / Editór Noémio Falcão

Dili (Timor Post)—Suspeitu ho inisiál ACP oho nia feen EDB tanba haksesuk malu kona-ba selu oan sira nia eskola.

Akontesimentu iha loron Kuarta (19/01/2022) kalan iha Bebonuk-Dili.

Polísia to’o iha fatin akontesimentu vítima hakotu ona iis maibé haree suspeitu sei kaer tudik iha liman hodi oho.

“Kazu ne’e nia motivu akontese tanba atu selu labarik nia eskola,” Komadante Eskuadra Don Aleixo, Inspetór Asistente Americo F. da Costa ba Jornalista sira iha Aimutin, Kinta (20/01/2022).

Nia haktuir, tuir kronolojia, fofoun feen husu osan ba laen maka mosu haksesuk malu ikus mai laen foti tudik oho kedas feen.

“Suspeitu nia feen ne’e sona iha fatin barak, kazu ne’e akontese hodi kalan, maizumenus tuku 10:15 hanesan ne’e, suspeitu ne’e ami to’o mak foin hasai tudik husi nia liman,” Inspetór Asistente Americo haktuir.

Nia dehan, polísia lori kedas suspeitu ba hatama iha sela eskuadra Don Aleixo, enkuantu kontaktu kedas ambulánsia hodi lori vítima ba iha Hospital Nasionál Guidu Valadares (HNGV).

No More Posts Available.

No more pages to load.