La’en duni Feen iha Kupang no Tama Timor ho Ilegalmente

by -2.097 views
Imajen ne'e hatudu autoridade defeza no seguransa iha fronteira asegura hela suspeitu. Foto Espesial

Jornalista Jaime Pires / Editór Noémio Falcão

Dili (Timor Post)—Suspeitu ho inisiál JDS hetan kapturasaun husi servisu konjunta Unidade Patrullamentu Fronteira no FALINTIL-Forsa Defeza Timor Leste (F-FDTL) iha toos laran área Postu Integradu Salele Mota-Masin.

JDS deklara ba autoridade seguransa katak nia laen ho inisiál EAM maka duni iha Kupang-Nusa Tenggara Timur (NTT)-Repúblika Indonézia ho rajaun ne’ebé seidauk klaru.

JDS dehan nia laen nu’udar eis milísia pro-autonomia.

Imajen ne’e hatudu parte saude evakua suspeitu ba kuarentena. Foto Espesial

Autoridade sira halo kapturasaun iha loron Segunda (10/01/2022). No submete kedas ba parte saúde iha fronteira hatama ba kuarentena hodi prevene moras daet COVID-19 ho variante foun Omicron.

“Sidadaun Timor Osidental ne’e halai tama mai territóriu nasionál tanba hetan amiasa husi nia la’en nu’udar Ex milisia Pro Otonomia ho inisial EAM ne’ebé hela iha Timor Osidental,”  haktuir Komadante UPF, Superentendente Euclides Belo ba Timor Post via telefone.

Euclides dehan, suspeitu iha ona parte saúde nia liman hafoin kumpri kuarentena loron 14 maka kontinua ba prosesu investigasaun hodi deskobre lia loos husi movimentasaun sidadaun estranjeiru ne’e liu husi dalan ilegal.

“Ne’ebé dadaun ne’e sidadaun Timor Osidental ne’e lori ona bá Karantina, nia kumpri tiha loron kuarentena mak foin kontinua ba prosesu tuir mai,” Euclides subliña.

No More Posts Available.

No more pages to load.