Labele Halimar ho Feto

by -314 views
Espoza Prezidente Repúblika, Cidália Nobre Guterres halo hela intervensaun. Foto Midia PR

Ainaro (Timor Post)— Espoza Prezidente Repúblika, Cidália Nobre Guterres, iha nia kampaña kona-ba impaktu káben no isin rua sedu, husu ba sidadaun hotu atu labele halimar ho feto nia vida.

Cidália husu inan feto vulneravel sira atu labele nonok de’it bainhira hasoru problema ho mane sira.

“Sé imi mak hakarak duni ne’e oin seluk maibé, ema ruma mak halo violasaun ne’e labele nonok hodi hato’o ba parte relevante tanba ema nia vida la’ós buat baibain hodi halimar,” Cidália subliña kestaun ne’e bainhira hala’o vizita ba feto vulneravel 45 iha munisípiu Ainaro.

Iha ámbitu vizita, espoza xefe estadu nu’udar embaixadora ba kampaña impaktu negativu husi kaben no isin rua sedu, hatete, nia gabinete hala’o programa ne’e la’ós haree de’it ba krimi no abuzu ninian maibé haree mós kona-ba sira ne’ebé hakarak atu kontinua eskola no sira ne’ebé lakohi kontinua estudu maibé inan ne’ebé ho tinan ki’ik oinsá atu hadi’a moris hodi tau matan ba uma laran tanba mane abandona.

“Tanba ne’e inan isin rua sira bainhira hasoru ona situasaun hanesan ne’e tenke kuidadu aan no labarik ne’ebé iha tanba buat hotu sei la’o tuir dalan,” Cidália subliña.

“Ida ne’ebé mak halo aktu ba labarik feto sira tenke hatan ba ema seluk ninia vida tanba ema nia vida ne’e sagrada no ema seluk labele halimar,” nia hatutan.

Maluk sira ne’ebé hasoru problema bele hato’o keixa liuhusi meius saida de’it ba autoridade kompetente.

“Programa ne’e iha tinan kotuk lansa tiha maibé moras covid-19 tama tiha maibé espera katak ba oin bele la’o tanba ida ne’e tama ona iha programa tatoli ba Cidália,” nia dehan.

Nia hatete, sei halo programa edukasaun no programa ekonomia dezenvolvimentu komunitáriu oinsá maluk feto ne’ebé sai ona inan no oan hodi hatutan moris.

“Ha’u mai rona sira nia preokupasaun, sira tatoli no ha’u nota hela ho planu sei haree hamutuk oinsá atu fó solusaun liu husi apoiu tuir saida mak ami bele maibé ida ne’ebé la’ós ami nia kompeténsia sei hato’o ba governu hodi haree,” nia tenik.

Maibé inan feto sira ne’ebé eskola to’o dalan klaran la hotu ne’e la’ós akontese de’it  iha munisipíu Ainaro de’it maibé iha mós munisipíu seluk no kapital mós barak inklui balun familía mak hakarak oan kaben to’o isin rua inan aman desidi husik malu.

Fatin hanesan Country Director Plan Internasionál Timor Leste, Diliana Ximenes dehan, espoza prezidente mai vizita grupu sira ne’e tanba espoza nu’udar Plan Internasional nia embaixadora ne’ebé serbisu hamutuk ho plan durante tinan rua ona.

“Ami serbisu hamutuk hodi halo kampaña ho esforsu hodi bele trava isin rua sedu no kaben sedu ba ita nia oan feto sira inklui violensia hasoru feto no labarik feto sira”nia sublina.

Neduni vizita embaixador Plan internasionál iha edifisiu Aileu espesial tebes hodi hasoru grupu feto hodi rona sira nia preokupsaun”Tatoli. Cidália.

“Iha munisipíu Ainaro ami rejistu alin feto isin rua sedu no kaben sedu hamutuk ha’at nolu (45) neduni serbisu hamutuk hodi empodera tuir aktividades ne’ebé Plan iha”nia dehan.

Tuir observasaun Timor post nota katak, iha vizita ne’e espoza Prezidente Repúblika hanesan embaixadora ba kampaña impaktu negativu husi kaben no isin rua sedu enkontru ho feto vulneravel sira hodi rona diretamente preokupasaun no hafoin remata simbolikamente entrega apoiu aihan baziku no seluk-seluk ba feto vulneravel sira.

No More Posts Available.

No more pages to load.