LABEH Gradua Kindergarten School Na’in-12

by -351 views
Foto TP: Mariano Do Santos

Jornalista Estajiáriu Mariano Do Santos / Editór Noémio Falcão

Dili (Timor Post) – Organizasaun Noun Governamental (ONG) Lalenok Ba Ema Hotu (LABEH) liuhusi Vocational School of Languages & Humanities realiza serimónia graduasaun periodu XXI ba  eskola jardin infânsia (Kindergarten School) hamutuk na’in-12.

Vocational School of Languages & Humanities (LABEH-VS) hari’i iha loron 24 Marsu 2009 hanesan eskola vokasional ida ne’ebé hetan inaugurasaun husi Presidente RDTL José Ramos Horta ho Prezidente Parlamentu Nasional  Fernando La Sama de Araújo akompaña husi Sekretáriu Estadu Formasaun Profesionál no Empregu (SEFOPE) interinu Alfredo Pires.

Hafoin serimónia graduasaun, Diretór Ezekutivu LABEH, Christopher Henry Samson ba Jornalista sira subliña, graduadu sira durante tinan ida ho balu apriende lian ingles, portugués, jornalizmu no administrasaun.

Samson komenta, labarik sira hatudu duni kapasidade, kakutak mamar tanba manorin sira aprezenta uitoan de’it ba sira kaptasaun lais tebes.

“Ki’ik oan sira ne’e bele hamrik no ko’alia iha ema barak nia oin, no halo ita admira ba sira nia talentu ho sira nia barani katak, sira uza lian ingles, portugués no tetun ne’ebé la’ós loron-loron sira nia inan-aman sira ko’alia,” Samson hatete.

Samson hakarak labarik sira kontinua eskola ba oin iha eskola sira kualidade atu kontinua saida maka LABEH oferese ona sei sai tasak liu tan.

“Ha’u nia esperansa maka, bainhira sira kuandu sai husi LABEH ba fatin ne’ebé di’ak liu LABEH, tanba sira nia fundasaun komesa metin iha tinan ida nia laran, no sira nia matenek komesa hatudu ona iha nivel aas, enkuandu sira fila ba fatin ne’ebé english no portugues laiha, sira halimar ho materia, sira edukativu, laiha automatikalmente ba iha matenek sira ne’ebé mak aprende durane tinan ida nia laran sei sai sia-sia de’it, tanba ida ne’e nafatin enkoraja sira atu aprende di’ak liu tan iha futuru oin mai,” Samson hatutan.

LABEH kontinua fó oportunidade ba inan-aman sira ne’ebé oan to’o ona tinan haat ba leten, atu bele halo inskrisaun iha LABEH

“Tanba ne’e mak LABEH husu, karik iha ema ruma rejistu ba nia oan iha LABEH, no sira ne’ebé mak eskola iha fatin seluk atu transferensia mai iha ne’e, LABEH mós odamatan nakloke hodi simu estudante sira ne’e,” Samson hatete.

No More Posts Available.

No more pages to load.