Labarik ho Idade Entre 12-18 Hamutuk 37.509 Seidauk Simu Vasina Daruak

by -821 views
Diretora Servisu Saúde Munisípiu Dili, Agostinha da Costa Seguradu

(Reportajen Cardenio Alves/Editor Mateus da Cruz)

Dili (Timor Post) – Ministériu Saúde (MS), relata, dezde kampaña vasinasaun ba labarik sira ho idade entre 12-18 18 iha Outubru 2021, to’o agora labarik hamutuk 30.126 maka simu ona vasina doze daruak, enkuantu na’in 37.509 mak simu ona vasina doze dahuluk.

“Maizumenus labarik sira idade entre 12 too 18 hamutuk na’in 37.509 mak simu ona sira nia doze dahuluk vasina Covid-19 no labarik na’in 30.126 iha grupu hanesan mak simu ona sira nia doze daruak,” dehan

Diretora Servisu Saúde Munisípiu Dili, Agostinha da Costa Seguradu, iha Salaun konferénsia MSSI, Kaikoli, Tersa, ( 15/02).

Nia hatete, haree ba númeru kazu Covid-19 sa’e fila fali iha timor-leste maka presiza atu kontinua implementa vasina ba ema elejivel sira idade 12 ba leten.

Nia apela ba ema hotu ne’ebé mak simu ona vasina dahuluk tenke hakat ba Postu vasinasaun iha ida-idak nia rezidénsia hodi simu vasina kompleta doze daruak.

Entretantu, too ohin loron total vasina Covid-19 hamutuk doze millaun 1.250.444 mak administra ona, ho ema na’in 84,4% idade 18 ba leten mak simu ona vasina Covid-19 doze dahuluk no ema na’in 71,2% idade 18 ba leten mak simu ona doze daruak.

Ikus nia fó hanoin ba sidadaun hotu atu kontinua kumpre protokolu prevensaun hanesan fase liman beibeik ho sabaun no bee mós sulin, uza máskara, Evita ema halibur barak, no mantein distánsia fíziku mínimu metru 1.5 ho ema seluk iha fatin públiku. Lee notisia seluk iha jornal Timor Post/asesu you tube Timor Post)

No More Posts Available.

No more pages to load.