La Simu Subsídiu Liña Frente: Funsionáriu Abandona Servisu, Broker Greve APORTIL

by -862 views
Imajen ne'e hatudu Prezidente Autoridade Portuariu Timor-Leste (APORTIL), Flavio Cardouzo Neves konversa hela ho funsionariu balu iha Portu Dili. Foto TP: Jaime Pires

Dili (Timor Post)—Funsionáriu sira iha Portu Dili lakohi tama servisu tanba laiha direitu ba subsídiu liña frente ba luta kontra COVID-19. Entretantu komersiante intermediáriu alias broker halo asaun greve hasoru Autoridade Portuáriu Timor-Leste (APORTIL).

Broker sira halo asaun ne’e tanba sira labele asesu ba foti sasan sira iha Portu Dili tanba funsionáriu sira la tama servisu no odamatan hotu taka.

Reprezentante Funsionariu APORTIL

Reprezentante Funsionáriu APORTIL, hanesan mós Xefe Departamentu Operasaun no Kargos, Yader Arnaldo Bin Ali hatete, sira la halo servisu no taka odamaten APORTIL tanba la satisfaz ho parte balun dehan, sira la hetan subsídiu liña frente.

“Durante estadu emerjénsia, serka sanitária no konfinamentu obrigatóriu ami servisu apoiu tebes governu ida ne’e, maibé ikus mai ami laiha direitu ba subsídiu liña frente,” Yader Arnaldo fó rajaun ne’e iha Portu Dili, Kinta (18/11/2021).

Nia dehan, sira prepara hotu ona sira nia dokomentus no lista prezensa sira maibé parte balun dehan, lei la fó dalan atu hetan subsídiu liña frente.

“Iha tinan kotuk ami hetan, agora dehan lei la fó dalan ba ami atu hetan subsídiu liña frente, ho ida ne’e mak ami la satisfaz hodi la halo servisu,” Yader subliña.

Reprezentante Broker no Ajénsia

Iha sorin seluk, reprezentante Broker no Ajénsia, Ijaias da Costa da Silva husi Ajénsia Bolloré hatete, problema iha APORTIL ne’e internal sira nian, no sira halo asaun tanba odamatan taka ba sira fó impaktu boot tebes ba sira nia servisu.

“Ami halo greve tanba kliente sira ezije ami atu hasai kontetor sira agora, agora sira taka fali odamatan boot hodi kontetor sira labele sai ne’e tanba saida, tuur loos sira iha problema estrutura iha para rezolve sira nia problema internal servisu operasional tenke la’o nafatin,” Ijaias afirma.

Nia subliña, tanba la autoriza kontetor atu sai ne’e sei fó impaktu ba nasaun no mós ba povu, tanba sasán sira hanen Foos Mina la sai husi Portu ne’e, la’ós fó impaktu de’it ba Ajénsia no Broker sira maibé ba Nasaun no Povu tomak.

Ba ida ne’e Prezidente Autoridade Portuariu Timor-Leste (APORTIL),  Flavio Cardouzo Neves hatete, asaun sira ne’ebé mak funsionáriu sira halo ne’e Konsellu Administrasun la hatene tanba iha loron hirak ba kotuk sira esplika ona ba Funsionáriu sira.

“Iha loron hirak liubá ita esplika ona ba sira katak, ema ne’ebé mak atu hetan subsídiu liña frente ne’e bazeia ba rezolusaun Konsellu Ministru ne’e mensiona klaru iha ne’ebá, tanba iha ne’ebá naran APORTIL laiha,” dehan Nia.

Nia subliña, tanba desizaun ne’e ema polítika mak foti no sira halo koordenasaun tanba iha Parlamentu Nasionál no Instituisaun balun mós temi lista husi APORTIL nian, ho estetimentu sira ne’e mak fó konfiansa ba Funsionáriu sira.

“Maibé Konsellu Administrasun hatete ba sira kalma tanba buat sira ne’e presiza han tempu hodi bele rezolve, la signifika ita atu taka fali atividade sira iha Portu Dili ne’e,” nia hatete.

Nia deklara, ho ida ne’e nia parte fó ona orentasaun hodi loke nafatin atu atividade kontinua la’o, tanba sasán sira hotu tama iha Portu Dili, sé taka fó afeta ba atividade sira seluk.

“Tanba ne’e mak ita fó ona orentasaun ba Diretor Operasaun atu loke nafatin no fó tempu ita oinsá atu ko’alia buka solusaun oinsá, tanba ne’e fó tempu ba konsellu administrasaun hodi ba kordena ho Ministeriu Relevante,” nia hatete.

No More Posts Available.

No more pages to load.