La Nina Ameasa Timor, Taur Preokupa Solusaun ba Estragu 4 Abril

by -1.480 views
Primeiru Ministru Taur Matan Ruak

Jornalista Jeremias Soares / Editór Noémio Falcão

DILI (Timor Post)—Primeiru Ministru Taur Matan Ruak preokupa ho alerta meteorologia husi Austrália kona-ba Timor-Leste sei hasoru fenómenu La Nina ka udan monu rai la tuir tempu ne’ebé posibilidade akontese iha fulan Outubru ne’e to’o tinan oin.

Taur hatete, situasaun ne’ebé akontese iha 4 Abri liuba, bele akontese fila fali, tanba fenomena La Nina ne’ebé sei afeta fali Timor, bazeia ba dadus meteorlogia Austrália nian.

Mudansa klimátika ida ne’e halo Taur preokupa tebes ho obra konstrusaun sira ne’ebé hetan estragu iha 4 Abril.

Nune’e, Xefe Governu ne’e alerta ona ba iha KAFI, ne’ebé lidera husi Vise Primeiru Ministru no Ministru Planu Ordenamentu, José Maria dos Reis, Ministériu Obra Públika, Transporte no Komunikasaun, no mos Ministeriu Finansas, ne’ebé iha responsabilidade boot jere fundu infrasturtura ba projetu sira ne’ebé presiza halo.

“Ne’e buat ida ke ita preokupa, ita iha komisaun tékniku ida hodi halo levantamentu, ne’ebé lidera husi professor Benjamin, ho tékniku sira husi Obra Publika no Planu Ordenamentu, tuir relatóriu preliminar ne’ebé sira hatete, iha buat balu ke ita bele halo lais, mais iha buat balu ke presiza estudu profundu, se ita hakarak garante nia kualidade iha tempu naruk,” Taur deklara liuhusi konferensia imprensa, iha rezidénsia ofisial Xefe Governu, Farol, Tersa (14/09/2021).

Taur dehan, ho klima ida agora, bele iha risku ne’ebé mak pior liutan, enkuantu la halo intervensaun lalais.

“Ha’u kontinua alerta para sira tau atensaun ida ne’e, purke ha’u nia preokupasaun ho klima ida agora ne’e, bele iha risku pior liutan, se ita la halo intervensaun lalais,” Taur afirma.

Taur hatutan, Ministeriu Estatal, Protesaun Sivil no Planu Ordenamentu, haree hela oinsá mak ajuda vítima afetadu indusaun 4 Abril liuba, ne’ebé mak daudaun ne’e sei hela iha lona okos.

“Ami haree hela halo nusa mak ajuda sira, no lori tempu oitua, tanba haree alternativa halo nusa mak sira tenke ba fatin ne’ebé seguru, tanba fatin ne’ebé sira hela ne’e risku. Ita tauk sira fila-fali ba iha ne’eba, aban bainrua bele hetan fali situasaun ida pior liu ida ne’e, entaun naturalmente agora Governu haree hela para posibilidade halo nusa mak hetan fatin temporáriu ba sira, ate ke aguenta tenke hetan fatin difinitivu,” Taur dehan. (jry)

No More Posts Available.

No more pages to load.