LA IHA DALAN BA VIII GOVERNU RENOVA FALI PL-OGE 2020 IHA SESAUN LEJISLATIVA NE’E NO TUIRMAI

by -196 views

Mestre Pe. Júlio Crispim Ximenes Belo, Drs, Ldto, Mdpri.

(Jurista no Akadémista)

  1. Faktu Relevante ba PL-OGE 2020
  2. Iha loron 3 Dezembru 2019, VIII Governu Konstitusionál retira nia Proposta da Lei OGE 2020 (PL-OGE 2020) ho baze Rejimentu Parlamentu Nasionál (RPN) art. 95.º n.º 2.
  3. Mezmu la iha dalan atu hatama fali, VIII Governu Konstitusionál, iha loron 19 Dezembru 2019 no kompleta iha loron 14 Janeiru 2020, tenta submete fali PL ba matéria hanesan (ba OGE 2020) no hatama hikas ho númeru foun [PL. OGE 2020 n.º 9/V(2.ª)].
  4. Maibé, infelizmente, iha votasaun ba generalidade iha Parlamentu Nasionál (PN), proposta lei referida konsege hetan votos afavór 13 (sanulu resin tolu), kontra 15 (sanulu resin lima) no abstensaun 25 (ruanulu resin lima). Nune’e PL N.º 9/V(2.ª) ba OGE 2020 ne’e la pasa iha diskusaun no votasaun jeneralidade.
  5. Faktu sira-ne’e hamosu ipóteze rua: disolve PN ka demite VIII Governu Konstitusionál depende ba Faktu ida neebe relevante jurídika-konstitusionalmente.
  6. Hosi ipóteze rua-ne’e, lori ba meza redonda hodi hamosu konkluzaun: 1) mantén PM TMR (viabiliza VIII Governu Konstitusionál no hatama hikas PL-OGE 2020 iha tempu besik); 2) movimentu polítiku iha PN (Demisaun VIII Governu Konstitusional); 3) Eleisaun Subsekuente ka Antesipada (ES/EA) (Disolve PN).
  7. LOGE 2020 ladauk iha.

Nune’e, elaborasaun ne’e mosu atu enkuadra faktu referidu sira tuir baze legál ne’ebé prevista iha CRDTL, Lei n.º 13/2009, de 21 de Outubro, sobre Orçamento e Gestão Financeira (LOGF) no Regimento do Parlamento Nacional n.º 1/2016 de 11 de Maio (RPN).

  1. Enkuadramentu Legál

2.1. PL OGE 2020 Retirada (Não Votada)

Atu entende didi’ak konseitu jurídiku “não votada” tenke halo análize ba CRDTL art. 97.º ne’ebé hateten hanesan tuirmai: 1) Projetu no proposta Lei sira-ne’ebé mak REJEITADA tiha ona, la bele renova iha sesaun lejislativa rasik [CRDTL art. 97.º n.º 3]; 2) Projetu no proposta Lei sira-ne’ebé mak LA VOTADA iha sesaun lejislativa, la karese atu renova iha sesaun lejislativa tuirmai, eseptu iha lejislatura remata [CRDTL art. 97.º n.º 4]; 3) Proposta Lei sira ne’ebé mak la vota, kaduka ho demisaun Governu [CRDTL art. 97.º n.º 5].

Iha ne’e, tenke kompreende didi’ak konseitu jurídiku sira hanesan tuirmai: Primeiru, konseitu PL “rejeitada” [CRDTL art. 97.º n.º 3] neebe tenki liga ho kompetensia Presidente do Parlamento Nacional (PPN) atu admite ka rejeita tekstu projeitu ka proposta lei ka rezolusaun, projetu deliberasaun no rekerimentu sira, kuandu verifica sira-nia regularidade rejimentál [RPN art. 17.º n.º 1 al. d)].

Segundu, konseitu jurídiku PL “não votada” [CRDTL art. 97.º n.º 3]. Atu kompreende konseitu referidu, tenke interpreta liuhosi entendimentu ba prosesu lejislativu komún. Iha prosesu referidu, autór sira bele retira Proposta ou Projecto da Lei, até votasaun ba jeneralidade [RPN art. 95.º n.º 2]. Prosesu votasaun ba Plano, Orçamento Geral do Estado, Execução Orçamental e Conta Geral do Estado konsiste hosi faze votasaun hanesan tuirmai: 1) Votasaun ba jeneralidade [RPN art. 166.º n.º 5]; 2) Votasaun ba espesialidade [RPN art. 167.º]; 3) Votasaun globál-Finál [RPN art. 168.º]. Bele kompreende katak, iha ne’e, LA IHA REJEISAUN, TANBA PPN SIMU ONA NO LORI ONA BA DISKUSAUN, MAIBÉ AUTÓR PL MAK KANSELA ONA KONTINUASAUN PROSESU DISKUSAUN NO VOTASAUN BA PL REFERIDA (la to’o iha prosesu votasaun), nune’e konsidera NU’UDÁR NÃO VOTADA”.

Terseiru, ideia kona-ba “PL não votada kaduka ho demisaun Governu” [CRDTL art. 97.º n.º 5]. Hanoin ne’e, la’os, simplesmente, informasaun hosi CRDTL katak “kuandu iha demisaun Governu, PL não votada sira kaduka, maibé, vicissitude ka konsekuénsia (inferência) susesível ba: 1) PL rejeitada [CRDTL art. 97.º n.º 3] no mos; 2) PL não votada [CRDTL art. 97.º n.º 3]. Bele dehan katak, ATU RENOVA PL NÃO VOTADA, ABSOLUTAMENTE, TENKE HALO DEMISAUN BA GOVERNU.

Hanoin ne’e relasiona ho Renovação da Iniciativa [RPN art. 94.º] ne’ebé hateten (haruka) hanesan tuirmai: 1) Projetu no proposta Lei sira-ne’ebé mak la vota iha sesaun lejislativa ne’ebé mak sira aprezenta tiha ona, la karese atu renova iha sesaun lejislativa sira tuirmai, eseptu iha lejislatura remata [RPN art. 94.º n.º 1], kona ba legislatura remta, bele dehan V legislatura só remata iha 2023; 2) Proposta Lei sira ne’ebé mak la vota, kaduka ho demisaun Governu ou ho termu respetiva lejizlatura [RPN art. 94.º n.º 2]. Iha diferensa entre RPN no CRDTL kona-ba espresaun “sesaun lejislativa sira tuirmai[RPN art. 94.º n.º 1] no “sesaun lejislativa tuirmai[CRDTL art. 97.º n.º 4]. Kona-ba diferensa ne’e, iha Direitu, aplika prinsípiu “lex superior derogat lex inferior”, katak, CRDTL nu’udár lex superior (aas-liu) prevalese sobre RPN hanesan lex inferior (kiik-liu), nune’e, aplika mak espresaun sesaun lejislativa tuirmai [CRDTL art. 97.º n.º 4].

Nune’e, bazeia ba entendimentu jurídiku ne’ebé esplika tiha ona, bele dehan katak PL-OGE 2020 konsidera nu’udár PL não votada, tanba VIII Governu Konstitusionál (nu’udár Autor) MAK KANSELA ONA KONTINUASAUN PROSESU DISKUSAUN NO VOTASAUN PL REFERIDA, hodi la to’o ba prosesu votasaun. Kona-ba PL-OGE 2020 não votada (la vota), CRDTL no RPN dehan (haruka) katak, LA KARESE ATU RENOVA IHA SESAUN LEJISLATIVA RASIK (15 SETEMBRU 2019 – 14 SETEMBRU 2020) NO IHA SESAUN LEJISLATIVA TUIRMAI (15 SETEMBRU 2020 – 14 SETEMBRU 2021). Tanba ne’e, atu bele halo renovação da iniciativa (konsidera nu’udár PL foun), nu’udar vicissitude, CRDTL no RPN haruka atu halo DEMISAUN BA VIII GOVERNU KONSTITUSIONÁL [CRDTL art. 97.º n.º 5 konjuga ho RPN art. 94.º n.º 2].

2.2. Faktu Submete hikas PL OGE 2020 ne’ebé Retirada tiha ona

Bazeia ba análize ne’ebé temi ona, bele halo apresiasaun ba actus VIII Governu Konstitusionál ne’ebé submete hikas PL. OGE 2020 n.º 9/V(2.ª). Iha ne’e, bele dehan katak, actus ne’ebé VIII Governu Konstitusionál no PN halo to’o iha prosesu votasaun konsidera nu’udár faktus INVÁLIDU juridicamente, tanba la kumpre exigência na regularidade regimental kona-ba renovação da iniciativa ba PL não votada – katak, PL-OGE 2020 NE’E LADA’UK KADUKA TANBA LADAUK HALO DEMISAUN BA VIII GOVERNU KONSTITUSIONÁL [CRDTL art. 97.º n.º 5 konjuga ho RPN art. 94.º n.º 2]. NUNE’E OINSA MAK BELE HATAMA HIKAS? BAZE LEGÁL IHA NE’EBÉ?

Fora hosi hanoin referidu, katak, liga fali ho LOGF, PL-OGE referida mós ultrapasa prazu legál ne’ebé LOGF husu (tenke aprezenta iha PN to’o 15 Outubru) [LOGF art. 30.º n.º 1]. LOGF rasik hateten katak, prazu legál ne’e la aplika kuandu: 1) Governu em funções demitidu [LOGF art. 30.º n.º 2 al. a)]; 2) Iha tomada de posse ba Governu foun [LOGF art. 30.º n.º 2 al. b)]; 3) Iha termu lejislatura [LOGF art. 30.º n.º 2 al. c)]. Enkuantu, iha VIII Governu Konstitusionál rasik, la akontese kondisaun sira-ne’ebé LOGF konsidera.

2.3. Faktu PL OGE 2020 não aprovada

Relasiona ho faktu referidu, CRDTL haruka Presidente da República (PR) disolve PN tanba konsidera grave crise institucional ne’ebé la permite aprovasaun Orçamento Geral do Estado [CRDTL 86.º alínea f]. Maibé antes disolve PN, PR tenke realiza actus formal sira hanesan tuirmai ne’e: 1) PR tenke halo audénsia prévia ho Partidu Polítiku sira-ne’ebé mak hetan asentu iha PN [CRDTL 86.º alínea f, 4.ª parte]; 2) PR mos tenke rona hosi Conselho do Estado [CRDTL 86.º alínea f, quinta parte] no; 3) PR tenke preenxe kondisaun sira-ne’ebé konsagra iha art. 100.º CRDTL [CRDTL 86.º alínea f, sexta e sétima parte] para labele monu ba inexistência jurídica do acto de dissolução.

Maibé liga ba konseitu jurídiku PL “não votada” [CRDTL art. 97.º n.º 3] no renovação da iniciativa ba PL não votada [CRDTL art. 97.º n.º 5 konjuga ho RPN art. 94.º n.º 2], bele dehan katak, FAKTU PL-OGE 2020 NÃO APROVADA JURIDIKAMENTE IRRELEVANTE (INVÁLIDU) tanba, PL-OGE ne’e LA DAUK KADUKA KUANDU LA IHA DEMISAUN BA VIII GOVERNU KONSTITUSIONÁL. tanba ne’e, mak PR durante ne’e haruka halo movimentu iha PN, ATU BELE HALO DEMISAUN BA VIII GOVERNU KONSTITUSIONÁL, LA’OS DISOLVE FALI PN.

Hanesan análize jurídika, bele dehan katak, CNRT hili abstain tanba hatene katak, hatama hikas PL-OGE 2020 ne’e inválidu, FRETILIN hili vota kontra tanba hatene katak, hatama hikas PL-OGE 2020 ne’e inválidu, PLP no KHUNTO vota a favor tanba la hatene katak, hatama hikas PL-OGE 2020 ne’e inválidu, PP sira seluk ne’ebé mak vota kontra, mos hatene katak, hatama hikas PL-OGE 2020 ne’e inválidu, enkuantu PP sira ne’ebé vota a favor la hatene katak, hatama hikas PL-OGE 2020 ne’e inválidu.

2.4. Faktu “viabilizasaun” no hatama hikas PL-OGE 2020 hosi VIII Governu Konstitusionál

Ba Faktu ne’e rasik, liga ba esplikasaun ne’ebé aprezenta ona, manifestamente, CRDTL no RPN hateten katak, PL REFERIDA LA KARESE ATU RENOVA IHA SESAUN LEJISLATIVA RASIK (15 SETEMBRU 2019 – 14 SETEMBRU 2020) NO IHA SESAUN LEJISLATIVA TUIRMAI (15 SETEMBRU 2020 – 14 SETEMBRU 2021). Tanba ne’e, atu bele halo renovação da iniciativa (konsidera nu’udár PL foun), nu’udar vicissitude, CRDTL no RPN haruka atu halo DEMISAUN BA VIII GOVERNU KONSTITUSIONÁL [CRDTL art. 97.º n.º 5 konjuga ho RPN art. 94.º n.º 2].

Nune’e, PP sira-ne’ebé mak iha hanoin hanesan ho VIII Governu Konstitusionál, bele konsidera nu’udar “PARTIDU POLÍTIKU IGNORANTEN (LA HATENE KONSTITUISAUN)”.

2.5. Faktu LOGE 2020 Ladauk Iha

Ko’alia kona-ba faktu LOGE 2020 laiha ne’e, tenke tau atensaun katak, Orçamento Geral do Estado (OGE) ne’e anual (Princípio de Anualidade) [LOGF art. 3.º n.º 1], katak, tinan-tinan tenke iha LOGE. Tanba ne’e, dotasaun orsamentál sira ba tinan fiskál ida (1) kaduka depois 31 Dezembru kada tinan finanseiru [LOGF art. 3.º n.º 7]. Agora ne’e, ita sei bele utiliza LOGE 2019 tanba de’it iha RD [LOGF art. 31.º].

Iha situasaun atuál Rejime Duodésimu (RD) sei fo dalan atu aplika LOGE 2019 (anterior), maibé, iha 2021, la iha dalan atu aplika LOGE 2019 tanba, laiha LOGE 2020. RD ne’e rasik korresponde ho Princípio de Anualidade [LOGF art. 3.º n.º 1], nee duni haruka mos atu osan sira neebe uza iha ano finanseiro 2020 tenki integra ba LOGE 2020; mak la iha LOGE 2020, osan sira neebe VIII Governu uza iha ano finanseiru 2020 la iha nia kobertura legal rasik, bele konsidera ilegal no implika responsabilidade penal ba titular VIII Governo.

Atu dehan de’it katak, hakarak ka lakohi, ABSOLUTAMENTE, LOGE 2020 tenke iha lai mak foin ba LOGE 2021. Karik hakat direta ba LOGE 2021, ne’e viola ona princípio de anualidade [LOGF art. 3.º n.º 1] no mos la bele aplika ona RD (tanba RD so to’o de’it 2019) karik tama ona iha LOGE 2021.

Nu’udár órgaun estadual competente, VIII Governu Konstitusionál tenke kumpre no subordina ba CRDTL no Lei – Princípio Primado da Lei [CRDTL art. 2.º n.º 1]. Katak, VIII Governu Konstitusionál tenke kumpre atu possibilita anualidade LOGE [LOGF art. 3.º n.º 1]. Atu bele hamosu LOGE 2020, CRDTL no RPN haruka atu halo DEMISAUN BA VIII GOVERNU KONSTITUSIONÁL [CRDTL art. 97.º n.º 5 konjuga ho RPN art. 94.º n.º 2]. Nune’e, ideia atu halo viabilizasaun no hatama hikas PL-OGE 2020 konsidera nu’udár VIOLASAUN BA KONSTITUISAUN, tanba VIII Governu Konstitusionál la subordina ba Konstituisaun no Lei [CRDTL art. 2.º n.º 2]

III. Konsiderasaun Finál

Bazeia ba esplikasaun ne’ebé aprezenta ona, bele konklui katak: 1) LOGE 2020, absolutamente tenke iha, no la bele hakat direta ba LOGE 2021 tanba princípio de anualidade (art. 3.º LOGF konjuga ho art. 2.º n.º 2 KRDTL); 2) Faktu PL-OGE 2020 NÃO VOTADA (RETIRADA) ne’e mak JURIDIKAMENTE RELEVANTE; 3) Hanoin kona-ba viabilizasaun no hatama hikas PL-OGE 2020 ne’e, iha kualkér forma, INVÁLIDU; 4) Atu bele iha LOGE 2020, liga ho situasaun atuál, DALAN ÚNIKU MAK DEMISAUN VIII GOVERNU KONSTITUSIONÁL [CRDTL art. 97.º n.º 5 konjuga ho RPN art. 94.º n.º 2] atu liu fali Mosaun Sensura, Pedidu Demisaun PM ka Inisiu Legizlatura Foun (art. 112.º KRDTL).

REFERÉNSIA BIBLIOGRÁFICA

CUNHA, Paulo Ferreira. Direito Constitucional Aplicado, Viver a Constituição, a Cidadania e os Direitos Humanos. Quid Juris: Lisboa, 2007.

GOUVEIA, Jorge Bacelar. Direito Constitucional de Timor-Leste. Gráfica de Coimbra, LDA.: Coimbra, 2012.

MIRANDA, Jorge. Manual de Direito Constitucionál, Vol. II, Tomo III e IV. Coimbra Editora: Coimbra, 2010.

MIRANDA, Jorge. Manual de Direito Constitucionál, Vol. III, Tomo V, VI e VII. Coimbra Editora: Coimbra, 2010.

PEREIRA, António Pinto. Princípios Gerais de Direito, 1.ª Ed.. Coimbra Editora: Coimbra, 2013.

VASCONCELOS, Pedro Carlos Bacelar. Constituição Anotada, República Democrática de Timor-Leste. Empresa Diário do Minho, Lda.: Braga, 2011.

No More Posts Available.

No more pages to load.