L7 Preokupa Restu Mortais Sei Naklekar

by -103 views

Timor Post (20/08/2020— Eis Segundu Komandante Regiao III Luta Libertação Nasionál, atual Deputadu PLP, Cornelio Gama, alias “L7”, husu ba Ministériu ba Assuntu Kombatentes Libertasaun Nasionál atu halibur hare restu mortais ne’ebé sei naklekar fatin-fatin hodi haloot iha fatin dignu.

Alende nee, eis FALINTIL ne’e husu atu tau matan ba membru FALINTIL sira ne’ebé mak sei moris hela iha vulnerabilidade ka moris susar maioria analfabetu.

“FALINTIL halo tinan 45, ita hare restu mortais halibur barak sei naklekar iha fatin-fatin, ita la hanoin hetan fali sira nia mate. Nee duni ha’u husu ba Sekretáriu Estadu no Ministru atu bele hare 2021 aloka orsamentu atu rekolla hotu restu mortais sira ba tau iha fatin Metinaru, nee para ita tenke respeita mós sira,”afirma L-7 liuhusi plenária iha uma fukun Parlamentu Nasionál Kinta (20/08).

Eis Gerrilleiru ne’e dehan dalaruma família sira haktuir ho tanis katak maski família mate ba ninia nasaun, mais folin laek, I ruin naklekar iha fatin-fatin de’it.
Entretantu Ministru Assuntu Kombatentes Libertasaun Nasionál Julio Sarmento Meta-Malik, hatete iha nia mandatu tinan rua sei redús buka mate ruin eseptu Alas, no sei harii monumentu iha postu administrative.
Razaun redús buka restos mortais tanba família barak maka depois de simu apoiu hosi Governu ba buka ruin la hetan.(Jornalista Julio Salinas Soares)

No More Posts Available.

No more pages to load.