ADVERTISEMENT

Muk Do a / Muk Pho: Baze Fraternidade (Persaudaraan) Sosiedade Bunak

Timor Post - Bobonaro · Kultura · Opiniaun
  • Share

Husi: Carlito Gabriel (Lito)

Dosente Departamentu Sosiológia, Instituto Superior Cristal (ISC), Fundador Asosiasaun Juventude Inovativu (JI)

ADVERTISEMENT
SCROLL FILA BA NOTISIA


Ita ema hanesan kriatura social ne’ebé presiza kria mos armónia, paz no fraternidade. Tanba moris nudar kriatura social presiza mos depende ba ema seluk ruma. Iha biblia Jesus mos hatete no nakatak “Hadomi nafatin imi nia maluk sarani hanesan maun-alin.  Keta haluha simu ema oin foun iha imi nia uma. Tanba ema balu simu tiha bainaka oin foun, sira hanoin dehan ema baibain, afinal bainaka nebee sira simu nee anju ”(13:1-2 n.d.) Fraternidade lolos laos mai husi relasaun ran deit maibe bele mos kria liuhusi dalan cultural sira ne’ebé ita nia beiala sira husik hela ona nudar referensia ba iha Jerasaun foun iha Timor-Leste liu-liu iha Sosiedade Bunak. Fratenidade bele hamoru Harmónia social hodi kria paz no estabilidade iha sosiedade.

Tuir Padre Frans Magnis Suseno Harmónia katak Ema hotu moris iha dame, paz, hakmatek, laiha konflitu no sempre simu malu nudar maun ho alin.  Ida ne’e signifika katak ema hotu-hotu moris ho hakmatek no kria ligasaun ho ema seluk. Ema sempre simu malu nudar maun-alin, servisu hamutuk no ajuda malu (Suseno 1996). Iha Sosiedade Bunak iha tradisaun ida ne’ebé beiala sira husik hela deste uluk hodi kria fraternidade (persaudaraan) maka hanaran Muk Do a ka Muk Pho.

Muk Do a / Muk Pho

Lee Mós :
Timor Agora : Kazu Oho-Malu (Omisídiu) Buras, Polítika Lei Sei Namlaek Nafatin

Muk Do a ka Muk Pho mai husi dalen Bunak signifika Muk katak Rai, Do signifika Ran, katak Hemu/han no Pho signifika Lulik. Muk Do a ho nia definisaun katak Juramentu hemu ran no Muk Pho katak Rai Lulik entre suku ho suku seluk iha sosiedade Bunak nomos ho Sosiedade sira seluk hanesan Kemak. Iha sorin seluk Atropolojista Timor oan Jos Trindade katak “Hemu ran hanesan ritual ida ne’ebé sagradu (Lulik) ho objetivu atu moris iha dame no hakmatek nia laran hodi hamoris relasaun ne’ebé diak no unidade entre Timor oan. Sira uza meius Juramentu/Hmenu ran”. Trindade mos argumenta katak Lulik mos sai hanesan Regulamentu/Lei sagradu ne’ebé kesi hela sosiedade hodi kria relasaun harmónia entre individual, knua no seluk-seluk tan.(Trindade 2011).

Muk Do a/ Muk Pho hanesan tradisaun ida ne’ebé bei-ala sira husik hela no Sosiedade Bunak iha Suku hotu-hotu fiar ida ne’e lulik tebes no ema ida labele viola. Ida ne’e kesi metin ona Ema Bunak oan sira hanesan Maun ho Alin mesmu antes ne’e seidauk kuñese malu entre sira. Exemplu hanesan Ema sira husi suku sira iha Postu Administrativu Lolotoe labele baku malu, oho malu ho Bunak oan sira husi suku seluk hanesan Molop, Sibuni, Lour no seluktan no Kemak Marobo iha Postu Administrativu Bobonaro. Bainhira sira ba suku sira ne’e hetan aifuan ruma tasak bele ku’u han deit mesmu tara bandu, to’os nain sira labele bandu/hase’e karik hetan tanba sira hatene ona katak ne’e ita nia Maun-Alin maka ku’u ba han maibe estraga maka labele.

Lee Mós :
Komisáriu Faustino: Kazu Bobonaru Laiha Keixa hosi Vítima

Tuir Capitão Armando Pinto Correia ne’ebé sai Administrador da Circunscrição de Baucau (1928-1934),  hakerek iha ninia Livru “O Gentio de Timor” esplika konaba juramentu hemu ran”. Nia hakerek: “Iha Reino dos Belos, moruk ka paktu ran nian ema prátika atu defende/tahan interese “mútuo e secreto”, dala barak, kiminozumós, no hemu ran, sira bele fó tulun ba malu atu tahan ema no riku-soin sira”.  Nia hatudu rai balu iha “Colónia de Timor”, ne’ebé lisan hemu ran sei hala’o hela (Dom. Carlos Filipe Ximenes Belo 2020). Muk Do a ka Muk Pho bele kesi Bunak oan sira evita husi problema sira hanesan tuda malu, baku malu, oho malu, naok no seluk-seluk tan. Liu husi Muk Do a ka Muk Pho mós bele kria amizade, unidade no Paz entre Bunak oan sira. Tanba Sosiedade fiar katak karik problema sira ne’e akontese entre sosiedade Bunak oan sira maka Natureza sei fo sansaun rasik hanesan mate, moras no rai halai/erosaun iha suku ne’ebé provoka hodi hamosu problema.

Lee Mós :
Kazu Bobonaru, Ministru António Orienta Halo Investigasaun ba Membru PNTL

Iha ne’e hakerek nain hakarak konklui katak, Sosiedade Timor-Leste liu-liu Bunak iha nanis ona tradisaun Fraternidade (persaudaraan) ne’ebé Bei-ala sira kria antes entre Knuaida ho Knua seluk ka suku ida ho suku seluk. Relasaun fraternidadeida ne’e tuir fiar kultura katak sei sagradu ate ohin loron ne’ebé Jerasaun foun presiza haburas no banati tuir. Ho nune’e husu mos jerasaun foun presiza haburas no mantein ita nia tradisaun Fraternidade ida ne’e tanba liuhusi Globalizasaun ohin loron ema barak influensia lalais ho tradisaun Fraternidade (Persaudaraan) rai seluk nian.

Bibliografia

13:1-2, Ebreu. n.d. Biblia Tetum .

Dom. Carlos Filipe Ximenes Belo, SDB. 2020. “Juramentu Hemu Ran.” Suara Timor Lorosa’e (STL).

Suseno, Frans Magnis. 1996. Etika Jawa Sebuah Analisa Falsafah Tentang Kebijaksanaan Hidup. Jakarta : PT. Gramedia Pustaka Utama.

Trindade, Josh. 2011. “Lulik: Valor Fundamental Timoroan Nian.” SCRIBD.

 5,931 total views,  9 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Muk Do a / Muk Pho: Baze Fraternidade (Persauda…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No