Kuba Komitmentu Tulun Governu Timor iha Área KomSos

by -81 views

Timor Post (18/08/2020)—Governu Kuba sei estabelese kooperasaun ho Governu Timor-Leste iha área Komunikasaun Sosiál (KomSos).

Embaixadór Kuba iha Timor-Leste, Oma L. Arrero Bentacourt hatete, komitmentu ne’e nia parte sei hala’o liuhosi kooperasaun ho Sekretaria Estadu Komunikasaun Sosiál (SEKOMS).

Diplomata hato’o afirmasaun ne’e bainhira hasoru malu ho Sekretáriu Estadu ba Komunikasaun Sosiál, Merício Juvinal dos Reis “AKARA” iha loron Segunda (17/08/2020), iha Palásiu Governu, Dili.

Durante ne’e, nasaun rua iha ona kooperasaun iha área saúde, edukasaun no seluk tan no iha enkontru ne’e, parte rua explora ideia oinsá atu hala’o mós kooperasaun iha área komunikasaun sosiál.

SEKOMS hatete ho kooperasaun ne’e bele possibilita profisionál komunikasaun sosiál sira atu  partilla ideia no experiénsia iha eventu importante balun iha Kuba ka iha Timor-Leste.

Fó hanoin hikas fali katak, Governu Kuba fó ona apoiu ba Timor-Leste iha área oioin desde nasaun ne’e restaura ninia independénsia. (cao)

No More Posts Available.

No more pages to load.