KSTL Rejista Kazu Violénsia Doméstika no Seksuál iha Uma no Servisu Fatin

by -115 views
Vise Sekretáriu Jerál KSTL, António da Costa Martins

Jornalista Estajiáriu Mariano Do Santos / Editór Noémio Falcão

Dili (Timor Post)—Durante fulan-7 hahú husi fulan Marsu to’o Outobru tinan ne’e, Komfederasaun Sindikatu Timor-Leste (KSTL) rejista kazu violénsia doméstika no seksuál hamutuk-10.

Vise Sekretáriu Jerál KSTL, António da Costa Martins haktuir, númeru kazu ne’ebé sira rejista bazeia ba keixa husi traballador sira ne’ebé mak servisu iha kompaiña.

“Ita rejistu kazu violénsia doméstika no violénsia seksual hamutuk-10, husi vítima sira ne’e hanesan traballador ne’ebé mak servisu iha kompañia hanesan otelaria, konstrusaun no ospitalidade,” António haktuir ba Jornalista sira iha Hotel Novo Turismo, Dili, Tersa (23/11/2021).

Nia subliña, vítima sira nu’udar traballadór iha kompañia sira iha Dili balu hetan violénsia doméstika no seksuál iha uma no servisu fatin.

António dehan, impaktu husi kazu sira ne’e ba traballador sira la konsentra ba servisu no hili dalan ba justisa.

“Depois ami simu kazu ne’e KSTL refere sira ba iha Alfaela, atu nune’e nia justisa formal ne’e tenke la’o no hetan akompañamentu másimu husi Juridiku Alfaela no KSTL hodi to’o iha Ministériu Públiku,” António haktuir.

Husi númeru kazu hirak ne’e maioria maka prosesa ba Ministériu Públiku no Tribunal.

No More Posts Available.

No more pages to load.