Kronolojia Bispu Dom Basílio Hakotu Is

by -11.670 views
Matebian Bispu Diocese Baukau Dom Basílio do Nasimento, Pr.

(Jornalista;  Jaime Pires,Olga Soares/editor Suzana Cardoso)

DILI (Timor Post) – Bispu Diocese Baukau  Dom Basílio do Nasimento, Pr. hakotu is iha Hospital Nasionál Guido Valadares (HNGV) hafoin hetan, ata kasun moras fuan  Taquicardia Ventricuar  iha Munisípiu Kovalima.

Lee Notisia Relevante:BREAKING NEWS: Amu Basilio Hakotu Is

Tuir informasaun ne’ebé mak Timor Post asesu hosi HNGV iha sala mortuary katak, Dom Basílio sai kooselebrante ba serimónia misa ordenasaun sacerdotal diákonu na’in rua sai Amu lulik ne’ebé prezide hosi Bispu Diocese Maliana, Don Norberto do Amaral iha Postu Administrativu Zumalai, Munisípiu Kovalima. Ida seluk hosi sacerdotal diákonu na’in rua ne’e, Matebian Amu Basílio nia sobriñu ne’ebé konsidera hanesan oan hakiak.

Bispu Diocese Baukau Dom Basílio do Nasimento, Pr., minutu ikus iha HNGV

Tuir kronolojia ne’ebé Timor Post halibur, hafoin remata misa ordenasaun ne’ebé hala’o iha loron Kinta (28/10/2021),  Matebian Amu Dom Basílio deskansa iha kadeira leten. Derrepente hetan ataka saun moras fuan hodi transporte kedas mai Dili para halo tratamentu iha HNGV.

“Hori kalan iha serimónia Amu (Amu Dom Basílio)  nia oan hakiak hamutuk ho nia iha uma  laran sei hamnasa. Sei han. Depois amu akompaña  komunidade sira sei dahur. Teki-teki Amu monu. Família evakua kedas ba Hospital Suai maka ohin dadeer (30/10) foin tula mai Dili, maibé la konsege salva ona,” konta doutór hirak ne’ebé fó atendementu.

Hosi Hospital Suai ho Aviaun NAF, transporte kedas mai tun iha Aeroportu Internasionál Nicolau Lobato, maizumenus tuku 11:00 OTL (30/10) ne’e.

Hafoin hakotu is, parte médiku lori kedas mai iha sala mortuariu, iha maize menus tuku 13:45 OTL.  Iha Mortuariu sarani sira barak mak mai vizita no ho laran triste, inklui Frater sira no mós Madre sira. Diákonu Claudio Mendonca hateten, “Amu horisehik halo Misa ordenasaun iha Suai no hetan Ataka saun moras fuan iha tuku 20:00 OTL kalan. No ohin 11:00 OTL mak transporte mai iha HNGV.”

Nia subliña, ami konsege lori mai HNGV, maibé ‘a la konsege salva nia vida no hakotu is iha tuku 12: 00 meiudia ne’e. “Ohin parte Igreja dehan, orasida lori sai, sei ba tau iha Igreja Katedrál, depois mak deside prosesu kontinuasaun ba funebre ne’e oinsá,” tenik nia.

Bispu Diocese Baukau Dom Basílio do Nasimento, Pr bainhira evakua mai Dili. (Foto Medsos)

Iha parte seluk misa moruk Amu nia sobriñu ne’ebé konsidera hanesan oan hakiak nian iha Parókia Ave Maria Suai foin too klaran de’it. rona ona katak Amu Bispu Basílio  hakotu ona  iis, nune’e tenke aselera hodi termina. Iha misa ne’e Amu, madre no sarani sira hotu ho mata-wen rona novidade ne’e. (***)

No More Posts Available.

No more pages to load.