KPMD hahú tiha ona Operasaun ba Selebrasaun Natal no Tinan Foun

by -123 views
Foto Dok. PNTL

DILI—Komandu Polísia Munisípiu Dili (KPMD), hahú aplika tiha ona planu operasaun ba selebrasaun festa Natal no Tinan Foun 2021.

Komandante KPMD, Superintendente Xefe Polísia Hendrique ba Jornalista sira informa, planu operasaun hahú ona iha loron 10 Novembru no sei termina iha loron 10 Janeiru 2021.

“Ita nia prejensa ne’e halo kedas prevensaun tama ba loron bo’ot Natal no simu Tinan Foun ninia,” Komandante Henrique subliña iha kuartel PNTL Munisípiu Dili, Sesta (13/11/2020).

Nia dehan, asaun dahuluk KPMD ho karater prevensaun ho halo passa revista ba movimentu transporte ba mai munisípiu sira, liuliu sirkulasaun sidadaun sira ne’ebé lori kro’at.

“Ita halo nafatin operasaun ba transporte, tantu ba karreta, ba motorizada, i mos operasaun ba ema uza sasan kro’at nian para atu nune’e prevene krime,” Komandante Henrique hatete.

Nia dehan, maneira operasaun KPMD nian maka liu hosi patrollamentu la’o ain, ho patrollamentu uza karreta iha kualker tempu durante periodu Natal no Tinan Foun. (Jornalista: Florindo Coluna)

No More Posts Available.

No more pages to load.