Korea Seidauk Simu Traballadór Foun Exetu Returning

husi -75 views

Timor Post (04/03/2021)—Maski iha kontratu foun 400, maibé Embaixadór Korea iha Timor-Leste Kim Jheong Ho, Kinta (4/3) hatete Governu Korea seidauk simu traballadór foun relasiona ho covid-19.

Korea simu de’it traballadór returning ou sira ne’ebé antes servisu tiha ona iha Korea, ida ne’e mós vale de’it ba Timor-Leste ho Cambodia entre nasaun 15 tanba gráfika kazu Corona virus TL no Cambodia nian ladún alastra.

“Agora governu Korea situasaun korona seidauk simu, la’ós Timor-Leste maibé ba nasaun 15 seluk kontratu foun seidauk bele tama korea, so simu de’it returning”, hatete tradutór embaixadór Kim Jheong Ho, hafoin akompaña embaixadór enkontru ho sekretáriu estadu Formasaun Professional no Empregu Alarico Soares, Kinta ne’e.

Iha biban ne’e Sekretáriu Estadu Formasaun Professional no Empregu (SEPFOPE) Alarico do Rosario, Embaixadór Korea buka solusaun transporte ba traballadór returning 49 iha TL, tanba korea hapara tiha ona programa repatriasaun voluntáriu.

“Foin daudauk ita nia traballadór halo konferénsia imprensa kona-ba sira seidauk fila ba Korea ne’e, agora ohin ami mós ko’alia kona-ba ida ne’e oinsá buka dalan hamutuk hodi traballadór sira ne’e bele fila. Sira la ba tanba problema ita timor transporte laiha, tanba ne’e mak iha tempu badak ne’e sei halo karta ida ba iha embaixadór Korea hodi haruka ba governu Korea atu buka dalan hodi rezolve problema ida ne’e.

Tanba ita nia governu ho governu Korea ideia la hanesan, ita hakarak aluga aviaun ba lori traballadór sira ba depois fila, maibé Korea lakohi, sira hakarak aviaun ne’e tula ba fila kedas ka ema dehan PP, no sira mós lakohi aluga aviaun tama iha ne’ebé,” informa Sekretáriu Estadu Alarico.

Maski nune’e embaixadór Kim Jheong ho hatete, sira prontu servisu hamutuk ho governu Timor Leste liu hosi (SEFOPE) hodi buka solusaun ba problema ida ne’e, tanba governu Timor-Leste ho governu Korea iha amizade ne’ebé mak di’ak no metin.

“Agora ami hein karta hosi (SEFOPE), hodi ami aneksu fali karta ne’e ba governu Korea hodi bele buka solusaun hamutuk ba transporte ne’e hodi bele lori traballadór timoroan ne’e ba servisu iha Korea”, dehan embaixadór.

Jornalista : Jaime Pires
Editor : Mariano Martins