Konvite husi CNRT ba Mehara, Martinho Gusmão Deside Kandidata-an ba Prezidente Repúblika

by -2.457 views
Kandidatura Prezidente Repúbika, Martinho Gusmão hala'o konferensia ba imprensa iha rejidensia Metiaut, Dili. Foto Espesial

Dili (Timor Post)—Eis Padre Martinho Gusmão deklara ba públiku iha loron Tersa (18/01/2022) kandidata-an ba Prezidente Repúblika periodu 2022-2027.

Liuhusi konferénsia ba imprensa iha rezidénsia Metiaut, Dili, Martinho haktuir, nia deside kandidata-an ba pozisaun númeru ida iha RDTL (Repúblika Demokrátika Timor Leste) iha momenetu Partidu CNRT / Líder Nasionál Kayrala Xanana Gusmão konvida nia ba Mehara-Munisípiu Lautem.

Iha konferénsia ba imprensa ne’e, Martinho la ko’alia kona-ba nia desizaun iha momentu ba Mehara ne’e, maibé antes ne’e nia klarifika katak, hahú kedas mosu trazédia 20/05/2020, deputadu sira harahun meza iha Palrmanetu Nasionál, partidu PUDD mak husu no hato’o sira nia prontidaun atu lori nia ba Prezidente Repúblika.

“Ha’u simu, maibé laran rua-rua hela. Partidu PD bolu ha’u partisipa iha reflesaun hamutuk iha Maliana, ha’u ko’alia ho koordenador munisípiu sira, maibé sei namlele hela. Iha loron 13 fulan Outubru tinan 2020, CNRT konvida ha’u atu tuir “tour” ba Mehara. Iha loron tuir mai, Xanana ko’alia kona-bá ninia istória iha reorganizasaun luta ba liberrtasaun nasionál, 1979, maka hanesan momentu místico ida, maibé mos existencial tebes,” Martinho haktuir iha entrevista esklusivu ho G-RTV News.

“Agora mak ha’u hatene lolos no momos kedas, katak teoria “desmistificação” ne’eba ema ne’ebé hun ho abut la iha Timor mak bele ko’alia, maske namlele hanesan ai-lele. Hanesan ne’e… Bainhira Xanana haktuir saída mak mosu iha tempu ne’ebá, ha’u sente isin-fulun hamriik no matan manas los atu tanis. Ha’u sente hanesan haree thriller filme Enemiesatthe Gates, haree drama boot oinsá líder nasionál Xanana ho Raja Miguel (iha film karik Vassili ho Danilov) halai hasoru ameansa perigoza bo’ot ida: sira joga Povo Timor nia destinu no Nasaun tomak nia moris iha injury time nia laran. Kois dala ida, “kaka lafai” ne’e lafaek han mohu kedas. Iha tempu ne’ebá, cerco e aniquilamento ne’e metin no todan tebes. Injury time ne’e tan Amu Martinho Lopes no Amu Afonso labele kleur iha Mehara. Ho minutu oituan ne’ebé iha, Xanana ho Liurai taru sira nia kakorok, la iha kilat la iha bala hodi loke serku, atu teri netik Bispo ho Padre nia dalan hodi entrega dokumentu konabá Paz, ho esperansa atu hatama iha “batina nia bolsu”, lori destinu tomak Povo Timor nian atu mundu hatene. Liurai nia kaben, feto jovem Domingas involve iha drama ne’ebé perigu tebes. Ha’u imajina, oinsa mak destinu rai ida nian, moris povo ida nian depende ba ema na’in 5 deit. Kois dala ida, Timor tomak namtate! Iha film ne’e hatudu duni Batle for Stalingrad hanesan funu ideológika entre Nazismo hasoru Marxismo, nune’e mos bele dehan iha Timor hahu a paz iguamento (pendamain) ideológico, wainhira Comunismo rende ka foti liman ba Catolicismo. Hodi sadere-a’an ba catolicismo, ha’u hare oin sa mak Xanana lori comunismo tama ba limbo, husik FRETILIN moris rasik nu’udár partidu maibé hasai FALINTIL husi partidu no sai liman kroat ka lutu matan Povu nian. Xanana mak hatur novo paradigma ne’ebé hanaran novo nacionalismo. Iha ne’e la’ós ona partidu mak luta, maibé Povo  ne’ebé hetan hikas sira nia hun no abut, mahan no tatis iha Uma Kreda ho Uma Lulik.”

“Husi Mehara, ha’u halo voto ida – se Amo Martinho Lopes bele husik nia pozisaun saída de’it, maibé nia la husik Timor monu lakon iha akudesan laran, nune’e mos, Amu Martinho Gusmão brani foti risku atu tane metin rai-doben ida ne’e, keta monu rahun no lakon iha akudesan laran. Fila husiMehara, ha’u hasoru fali PUDD no dehan ba sira, uluk susar no todan hanesan ne’e Povu ki’ik no kbi’it laek brani foti oin hasoru pressaun husi militar Indonézia, tansa mak ho Partidu ki’ik ida hau la bele foti hirus matan? Ha’u brani! Loronsa’e husiTutuala ba to’o Oe-Cusse! Ha’u ho PUDD ne’e hanesan “David” deit, kiik no foinsa’e, maibe bele hatan ba polítika “Golias” sira nian.”

Maske nune’e, iha konferénsia imprensa, Martinho subliña, nia kandidata-an ne’e la hetan bensaun ka tula lima husi Xanana Gusmão.

Nia dehan, sente de’it Amu Papa Francisco, Bispu sira iha Timor no Padre sira maka fó bensaun ba nia hodi kompete iha eleisaun ne’ebé sei akontese iha loron 19 Marsu 2022.

Entretantu Martinho haktuir, partidu polítiku ne’ebé fó apoiu ba nia kandidatura maka PUDD (Partidu Unidade Dezenvolvimentu Demokrátiku).

“Ha’u agradese ba PUDD, partidu kiik ida ne’ebé korajen teb-tebes no laran metin teb-tebes husi kbiit uitoan ne’ebé iha, ita koko atu lori prosesu ne’e ba oin. Partidu ne’ebé seidauk komete erru iha nasaun ida-nee nia laran, partidu ne’ebé harii husi ki’ak no susar, maibé korajojamente, forsadamente atu lori prosesu mudansa iha ita-nia estadu,” Martinho subliña. (cao)

No More Posts Available.

No more pages to load.