Jornalista Jaime Pires / Editór Noémio Falcão
DILI (Timor Post)—Ministru Assuntu Parlamentár no Komunikasaun Sosial (MAPKOMS), Francisco Jerónimo informa, iha loron Kuarta (10/11/2021) Konsellu Ministru halo ona diskusaun ba dekretu lei subsídiu liña frente ba Jornalista sira.
Ba jornalista sira hafoin enkontru semanal ho Primeiru Ministru (PM), Taur Matan Ruak, iha Rezidensia Farol, Segunda (08/11/2021), Francisco subliña, nia parte maka prepara dekretu lei ne’e bainhira hetan ona aprovasaun husi Konsellu Ministru no Prezidente Repúblika promulga maka bele ona transfere osan ba konta bankaria jornalista ida-idak nian.
“Ha’u fiar konsellu Ministru sei aprova maibé depois ba fali Prezidente Repúblika mak ita haree took,” Francisco hatete.
Nia hatutan, kona-ba lista jornalista sira nian, iha nia ministériu parte administrasun halo prosesu hotu ona.
Kona-ba jornalista hira mak sei sai benifisiáriu ba subsídiu ne’e, governante ne’e salienta, bazeia ba lista ne’ebé mak média sira hatama.
“Benifisiáriu ne’e depende ba lista ne’ebé mak média sira hatama, hanesan iha GMN nia na’in hira, RTTL ne’e na’in hira no mós Timor Post ne’e na’in-hira, ami tuir lista ne’ebé mak hatama ne’e,” Francisco hatete.
