Konsellu Ministru Nomeia Administradór Munisipál Aileu-Ainaró no Covalima

husi -420 views
Foto: Media MD

Timor Post (10/02/2021)- Konsellu Ministru ofisialmente aprova projetu rezolusaun 3 hodi nomeia Leovigildo Amaral Pereira ba Administradór Munisípiu Ainaro, Abel da Conceição ba Administradór Munisípiu Aileu no Francisco de Andrade ba Administradór Munisípiu Kovalima.

Administradór na’in-tolu ne’e nia mandatu dura ba tinan 5 sura husi tinan 2021 to’o tinan 2026.

Ministru Prezidensiál Konsellu Ministru, Fidelis Leite Magalhães ba jornalista sira iha Palásiu Governu, Kuarta (10/02/2021), haktuir, projetu rezolusaun  tolu ne’e aprezenta hosi Ministru Administrasaun Estatál (MAE), Miguel Pedreira de Carvalho.

Fidelis hatutan, MAE  aprezenta ho dekretu lei governu nia ne’ebé kria portal munisipál,mós hetan aprovasaun hosi Konsellu Ministru.

Governante ne’e esplika, portál munisipál kontein dadus no informasaun sira kona-ba beins no servisu ne’ebé presta husi órgaun no servisu sira Administrasaun Públika Lokál, kona-ba investimentu públiku ne’ebé hala’o iha munisípiu ida-idak, ka levantamentu no estatístika oin-oin mai husi instituisaun públika oin-oin.

Jornalista            : Jaime Pires

Editor                    : Mariano Martins