Konsellu Ministru Aprova Dekretu Lei Regulamentu Dixiplinár ba PNTL

by -799 views

Timor Post (24/06/2020)- Ministru Prezidensiál Konsellu Ministru (MPKM), Fidelis Leite Magalhães informa, reuniaun Konsellu Ministru (KM),  aprova tiha projetu dekretu lei Regulamentu Dixiplinár ba Polisia (RDP) hodi regula membru Polisia Nasionál Timor-Leste.

“Konsellu Ministru Aprova projetu dekretu lei ne’ebé aprezenta hosi Ministériu Interior ezersisiu Interinu, Filomeno Paixão de Jesus kona-bá regulamentu dixiplinár ba polisia nasionál timor leste (PNTL)”, haktuir MPKM Leite Maglhaes ba Jornalista sira iha palasiu governu kuarta (24/06).

Ministru hatutan projetu dekretu lei ida ne’e hodi halo revizaun ba atuál regulamentu dixiplinár PNTL nian, ne’ebé aprova ona iha tinan 2004, no seidauk atualizadu.

“Regulamentu foun ida ne’e hakarak atu tada ba PNTL regra estruturadu lubuk ida hodi garante dixiplina institusionál no profisionál, hodi haroman loloos objetivu legal hosi polisia modernu, ne’ebé kria hodi defende sidadaun sira no hodi bele hatuur dixiplina ba relasaun fundamental ba sosiedade nia moris”,  hakotu Ministru.

Antes Ministru Defeza no Ministru Interior Interinu Filomeno Paixao, fó sai katak RDP foun ne’e fó mós kompeténsia ba Ministru Interior halo intervesaun fó sansaun direta ba membru polisia ne’ebé viola regra dixiplinár PNTL.(Jornalista: Jaime Pires)

No More Posts Available.

No more pages to load.