Komunidade Suku Laguemea Ezije MS Harii SS

by -160 views
Foto Espesial

DILI (Timor Post)Komunidade aldeia neen iha suku Legumea, postu administrativu Ermera, munisípiu Ermera ezije ba governu liuliu Ministériu Saúde (MS) harii Sentru Saúde (SS), atu nune’e komunidade sira labele la’o dook tan.

Komunidade aldeia neen ne’e kompostu hosi, Aldeia I, Atuletan, Sinlelo, Titihar, Peahein no Tidir, ho populasaun hamutuk 35.568, tanba ne’e sira husu ba Ministériu Saúde, atu estabelese Sentru Saúde ida iha suku laran.

“Ami iha Leguemea ho númeru populasaun ne’ebé boot, ami laiha postu tratamentu ida, maibé ami utiliza sede suku sai ba postu tratamentu, atividade tratamentu semana ida dala ida, pesoál sira mai fó tratamentu, maibé la’ós komunidade aldeia neen ne’e mesak, más iha tan suku neen mós mai halo tratamentu iha postu tratamentu ne’e”, Xefe suku Legumea, Avelino Menezes ba, ba Timor Post iha suku Legumea, Sábadu (02/10).

Xefe suku hatete, hahú hosi tinan 2018 nia hato’o ona pedidu ba Ministériu Saúde hodi estabelese Sentru Saúde  (SS) iha suku Legumea, nune’e hodi hakmaan inan isin rua sira atu partu besik iha sira nia hela fatin, labele ba tan sentru saúde Gleno hodi partu, maibé to’o ohin loron pedidu ne’ebé aprezenta seidauk hetan resposta pozitivu.

Suku neen ne’ebé ba halo tratamentu iha postu tratamentu Legumea mak hanesan, suku poetete komunidade hosi aldeia Samatae, suku Raeheu aldea Mageira, suku Estadu aldeia ida no suku Peoleu aldeia Letefoho, tanba suku hirak ne’e mak ninia populasaun hela besik baliza suku Legumea.

“Ne’ebé iha suku haat mak ninia populasaun mai halo tratamentu iha sede suku Legumea, tanba suku refere provizóriu uza hanesan postu tratamentu, maibé ho kondisaun ne’ebé la merese.

Iha fatin hanesan, komunidade hosi suku Legumea, Vital Salsinha, reforsa katak suku refere, akumula mós ho suku 6 ne’ebé mak sira nia komunidade baliza besik suku ne’e Leguemea.

“Ho sentru saúde no postu saúde ne’ebé ho distánsia dook hosi ami nia suku, fó difikuldade boot ba inan feto sira ne’ebé gravida. Tanba ne’e ami aproveita vizita ministra nian ami husu atu tau netik konsiderasaun ba ami nia proposta ne’ebé ami nia autoridade suku sira hato’o ona iha tinan hirak ba kotuk, atu ne’e konstrui fasilidade saúde iha ami nia suku, hodi fasil fó tratamentu ba ami nia komunidade, maibé to’o ohin loron rezultadu laiha”, nia rekomenda.

Enkuantu, Administradór Postu Administradór Ermera, Alexandre dos Santos Salsinha, informa populasaun Ermera hasoru problema boot oin haat, kompostu eletrisidade, estrada bee moos no saúde.

“Ita ko’alia kona-ba problema saúde, ita nia inan feto hirak ne’ebé hetan gravida hela iha suku, sira atu ba halo tratamentu iha sentru saúde Ermera ho distánsia ne’ebé dook, tanba ne’e sira nia ezijénsia ne’ebé sira husu ba ministra saúde ne’e pertenente tebes”, nia agradese.

Nia dehan, hanesan administradór postu mós la tuur nonook de’it, preokupasaun komunidade nian, administradór aponta hotu hodi lori ba debate iha munisípiu, tanba presiza atu korresponde komunidade ninia ezijénsia mós.

Hatán ba preokupasaun hirak ne’e, Diretór Gabinete Polítika Planeamentu Kooperasaun Saúde iha MS, Narciso Fernandes, hatete atu harii sentru saúde no postu saúde ida iha suku ida iha ninia kritériu.

“Rekizitu ne’ebé iha, ba dahuluk ita haree ba total populasaun mínimu rihun lima (5) to’o iha rihun 20, ida ne’e ita presiza haree, sera ke iha suku Legumea ne’e, nia liga ho suku hira no populasaun hira, presiza dadus levantamentu nune’e aprezenta liu hosi xefe sentru saúde no aprezenta ba diretór servisu saúde munisípiu no liu mós ita nia prezidente autoridade Ermera, para depois ekipa ida hosi ami nia diresaun mai halo levantamentu asesementu, prienxe rekizitu  ka lae, ita bele propoin tama iha sentru saúde ka lae”, nia rekomenda.

Tanba ne’e, prosesu atu harii sentru saúde ida presiza iha prienxe rekizitu ne’ebé mak ho ninia kritériu tuir prosedura ne’ebé mak Ministériu Saúde ne’e iha.

Maibé orientasaun ministra saúde nian katak munisípiu Ermera tama ona iha planu katak sei halo munisipál iha Ermera, katak tuir planu setór saúde nian 2011to’o 2030 sei tau iha planu. (res)

No More Posts Available.

No more pages to load.