Komunidade Refuziadu Maslidun Hetan Apoiu Haris Fatin

by -200 views
Ministra saúde, Odete Maria Freitas Belo akompania husi ekipa Cruz Vermelha rona hela mensajen obrigadu husi reprezentante familia refuziadu Maslidun. (Foto TP/ Olga Soares)

(Reportájen Olga Soares/Editor Suzana Cardoso)

DILI (Timor Post) – Atu refujiadus uma kain 45 labele halerik tan ba haris fatin maka Ministériu Saúde (MS) servisu hamutuk ho Cruz Vermelha de Timor-Leste (CVTL) oferese haris fatin tolu ho valor osan konstrusaun hamutuk U$2,400.00.

“Ita instala bee. Konstrui mós sentina atu ita nia komunidade sira hela iha lona okos bele utiliza fasilidade ho diak. Nune’e sira bele moris saúdavel hodi prevene ba moras sira ne’ebé halai ba saúde públika nian”

Esplika Xefe Departementu Saúde CVTL, João Pinto Soares ba Jornalista iha Lagoa I, Bairru Maslidun, Kinta, (20/05). Nia hateten, refuziadus iha Maslidun Tasi-Tolu durante ne’e halerik hela ba haris fatin.

Nune’e katak João, CVTL servisu hamutuk ho MS halo konstrusaun ba haris fatin no instala mós bee hodi komunidade hothotu iha bairru Maslidun bele utiliza ho diak. Liliu hirak ne’ebé hela besik area família refuziadu nian.

“Konstrusaun ida ne’e voluntariamente halo husi ita nia komunidade refuziadu rasik. Maibé, orasamentu hetan apoiu husi MS ho CVTL. Montante osan ne’ebé gastu hamutuk US$2,400.00. Husi MS U$900.00. No CVTL hamutuk U$1,500.00,” informa João.

Iha fatin hanesan Koordenador refuziadu Maslidun, Afonso José haksolok ho MS bele hatan ona familia refuziadu nia preokupasaun. Labarik no ema boot sira atu soe foer boot karik la ba ona fatin dook.

Em nome familia refuziadu, ami sente haksolok no agradese ba MS no CVTL ne’ebé ho fuan boot bele ona instala hariis fatin iha fatin ida ne’e. Fasilita ona ami oinsá labele soe fo’er boot arbiru. Fasilita ami saúdavel liu tan,” tenik Afonso.

Ho fasilidade ne’ebé iha MS, Odete Maria Freitas husu komunidade refuziadu atu bele asegura no utiliza ho diak. Uza haris fatin no bee ne’ebé iha ona. Nune’e hotu-hotu sei moris saudavel.

“Ba familia ho uma kain sira iha ne’e, saída maka MS apoiu ha’u hanoin seidauk sufisiente. Tanba ha’u haree familia ne’e rasik sei presiza buat barak. Maibé ha’u labele promete buat barak,” tenik nia.

MS Odete kompromete, sei nafatin fó instrumentu ba CVTL ho ekipa saúde atu nune’e bele nafatin tau matan ba familia refuziadu hirak ne’e. Nune’e bainhira iha ekipamentu ruma aat bele hatoo hodi kompleta.(Lee notísia seluk iha jornál Timor Post)

No More Posts Available.

No more pages to load.