Komunidade RAEOA Halerik Foos Menus

by -696 views
Domingos Elo

(Reportajen José Caet/Editor Mateus da Cruz)

DILI-Relasiona ho problema Ró Berlin la hala’o ninia operasaun ba mai Oekusi-Dili halo komunidade sira iha Rejiaun Administrative Espesiál Oe-kusi Ambenu (RAEOA), daudaun ne’e halerik ba problema foos tanba sirkulasaun foos iha merkadu daudaun ne’e menus no folin foos mós sa’e makas hodi prejudika ba povu kiik sira.

Domingos Elo, nu’udár komunidade iha aldeia Masin Suku Costa, triste tebes tanba dezde ró Berlin Ramelau paradu no la lori sasán hosi Dili mak foos nia folin sa’e maka’as.

“Ami agora iha ne’e (Oe-kusi) araska, tanba ró Berlin Ramelau la lori foos mai,” Elo informa ba Timor Post, Via WhatsApp, Kinta (12/05).

Nia hatete, komunidade sira susar liu mak foos, tanba kioske hotu la fa’an ona. Komunidade sira ne’ebé halo toos iha ai-han lokál entaun sira bele han batar, fehuk no ai-farina maibé ba sira ne’ebé la halo toos susar tebes.

Tuir nia, agora daudaun foos ho marka Beruang-Merah kilograma 20 uluk fa’an saku ida $14.50 USD agora sa’e ba $18 USD.

Nune’e mós foos ho marka Manu-Vitoria kilograma 25 uluk fa’an $14.50 USD Agora sa’e ba $20 USD. Iha mós foos marka Nona-Manis ho kilograma 12 uluk ninia presu dolar 10 agora sa’e ba $13,50 USD.

Alende kona-ba nesesidade bzika seluk hanesan Mina Konsumu (Bimoli), uluk fa’an ho presu $6 USD agora jargen ida $12 USD.

João Baptista Mala

Entretantu, João Baptista Mala, hatete foin lalais foos sei iha maibé horisehik no ohin kioske sira hotu laiha tiha ona.

Iha merkadu no kioske sira Oe-kusi villa mós foos laiha tiha ona, horisehiik lokraik ema buka atu sosa maibé kioske sira la fa’an dehan foos hotu.

“Foin lalais ami ba sosa foos marka manu-vitória iha kioske sira fa’an dollar 25, mais horisehik balun ba tan laiha ona,” nia konta.

João hatete, agora daudauk la’ós de’it iha loja boot sira maibé kioske ki’ik no Xineza sira nia loja mós foos laiha hotu.

Pokoknya foos laiha, baibain Ró halai mak lori mai hosi Dili agora Ró la mai foos laiha duni atu sosa”, nia lamenta.

Antes ne’e, autoridade Rejiaun Administrative Espesiál Oe-kusi Ambenu (RAEOA) garantia ai-han estavel, tanba konfirma ona katak segunda agora ro Berlin Ramelau hahú halo operasaun.

Leonia Monteiro

Adjunta Prezidente Autoridade Rejiaun Administrative Espesiál Oe-kusi Ambenu (RAEOA), Leonia Monteiro, kompromete katak horisehik halo ona koordenasaun ho Autoridade Portuáriu Timor-Leste (APORTIL), Kona-ba prosesu operasaun Berlin Ramelau Dili Oe-kusi.

“Nesesidade bázika agora difisil uitoan duni iha merkadu Oe-kusi, mais horisehik ha’u tuun diretamente ami haree prosesu manutensaun ro atu bele halo ona operasaun,” Leonia informa ba Timor Post iha resintu Parlamentu Nasionál.

Tuir nia, bainhira ro Berlin Ramelau hahu halo ona operasaun fila-fali, hanoin ekonomia iha Rejiaun Administrative Espesiál Oe-kusi Ambenu bele la‘o normal.

Durante ne’e, nia rekoñese katak nesesidade bázika folin sa’e duni iha merkadu Oe-kusi, liu-liu mina konsumu no kombustivel, maibé ida ne’e problema global.

Alende ne’e mós, adjunta autoridade kontinua halo audiénsia ho Ministru Transporte no Komunikasaun José Agostinho da Silva, deside kedas atu Berlin Ramelau Hahú halo operasaun iha segunda agora.

Daudaun ne’e armazein foos iha Rejiaun Administrative Espesiál Oe-kusi Ambenu sei iha, nune’e tuir nia interpretasaun públiku katak populasaun Oe-kusi hahú hamlaha ne’e laloos.

“Dala-ruma ema haree katak politiza, maibe autoridade RAEOA haree komunidade sira ninia moris di’ak hela, maibé nesesidade bázika mak tenke transporta hosi kapitál Dili,” hakotu. (Lee notisia seluk iha Timor Post/Asesu You Tube Timor post)

No More Posts Available.

No more pages to load.