Komunidade Keixa Kompañia Miramar Blok ba Bankada CNRT

by -107 views
Foto Espesial

Jornalista Jaime Pires / Editór Noémio Falcão

Dili (Timor Post)— Reprezentante Komunidade Aldeia 12 de Outubru, Suku Madohi, Munisípiu Dili keixa Kompañia Miramar Blok ba deputadu bankada CNRT, iha Parlamentu Nasionál, Segunda (22/11/2021), tanba sente vítima.

Komunidade sira hato’o keixa katak kompañia Miramar Blok hamutuk ho polísia ba suru sira nia rai, inkuantu estatutu rai ne’e sira nian ho baze dokumentu sira husi tribunal.

“Ita simu no rona inklui mós tetu solusaun kona-ba problema rai ida ne’e,” Deputadu CNRT, Patrocino Fernandes ba Jornalista iha, Parlamentu Nasionál, Segunda hafoin simu keixa.

Reprejentante povu ne’e haktuir, komunidade sira hetan ona termu ida husi tribunal bolu Auto Restituisaun de Pose, ne’e katak  provizóriu Tribunal rekoñese komunidade sira mak bele utiliza rai ne’e hodi hein desizaun final husi Tribunal katak sé mak na’in ba rai ne’e, dokomentus sira ne’e Tribunal fó ba komunidade sira iha tinan 2014 liubá.

Nia subliña, komunidade sira tenta buka sira nia advigadu uluk maibé ‘a fó solusaun nafatin, entaun sira ba hato’o iha Bankada CNRT, tanba iha semana kotuk, kompañia refere lori polísia ka ho forsa dudu komunidade sira nia rai iha Bairu ne’ebá.

Ba komunidade sira, Patrocino husu nafatin la’o tuir prosesu justisa.

Iha sorin seluk reprezentante Komunidade Aldeia 12 de Outubru, Maria Asuncao dos Santos hatete, sira husu ba Parlamentu Nasionál no Governu hodi foti solusaun lalais ba problema ida ne’e.

“Ami familia hamutuk 25 mak afeta ba problema ida ne’e, ami nafatin kumpre ba lei no orden maibé Kompañia ida ne’e la tuir lei, ne’ebé ami husu lei ne’e tanba saida mak ba la vale ba ema riku no osan iha maibé vale de’it ba ema kiak sira”, dehan Nia.

Nia esplika, tanba sira komunidade hetan karta provizoriu husu Tribunal katak ami mak iha direitu bele halo buat hotu-hotu iha rai ne’ebá.

“Maibé ami osan laiha no buat hotu-hotu laiha entaun husi Kompañia Miramar Blok ba foto hotu ami nia fatin no rai ne’ebá no halo konstrusaun iha ne’ebá,” Nia Hakotu.

No More Posts Available.

No more pages to load.