Komunidade Bairru Seroja, La Aseita Governu Hasai Sira Hosi Hela Fatin

by -881 views
Portavós Komunidade lee sai deklarasaun la seita governu hasai komunidade sira hosi hela fatin, iha Bairru Seroja, Aldeia Golgota, Suku Komoro. Imajen Esp

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post)— Komunidade Bairru Seroja, Aldeia Golgota, Suku Komoro, Sesta ne’e, halo deklarasaun, lamenta ho desizaun Governu atu hasai komunidade sira hosi sira nia hela fatin.

“Ami lamenta no rejeita total desijaun governu ne’ebé atu hasai ami husi ami nia rai, hodi fó previlejiu ba instituisaun privadu são Miguel Arcanjo no TVE duke nia povu rasik, tan ne’e ami konsidera hanesan desijaun injustu no la iha utilidade ba nia povu”, portavós komunidade, Elvis Martins, hato’o liu husi Konferénsia Imprensa, iha Seroja, Tasi Tolu.

Lee Notisia Relevante : Governu Prepara Millaun 2.7 USD ba Eskola São Miguel Hodi Buka Fatin Foun

Nia hatete, tuir lei orgániku VIII Governu ba fins investimentu boot kona bá arrendamentu ba rai no uma estadu, hanesan edifísiu ba eskola konsidera ou kategoria investimentu boot, ne’e kompeténsia husi Ministru Justisa, la’ós vise Ministru Obras públika. Tanba kompeténsia vise MOP nian atu haree de’it ba parte afetasaun estrada.

“Ami defende ami nia direitu tuir Konstituisaun RDTL artiguº 54 direitu ba propriedade privadu no artigu 58°, hela fatin no mós ami husu ba governu atu trata ami ho dignu laiha diskriminasaun no hatuur povu iha justisa sosiál tuir Konstituisaun artigu 6° ho objetivu estadu ho nune’e ami rejeita katak ami sei la aseita entrega rai ba eskola São Miguel no TVE, ne’ebé la konsidera nu’udar instituisaun estadu ida,”deklara.

Iha fatin hanesan, Xefe Aldeia Golgota, Bairru Seroja, Agostinho de Sousa Pereira, hatete, hanesan autoridade lokal, nia labele halo diskrimina ba populasaun sira maibé, husu atu komunidade no governu  tenke koopera malu hodi rezolve problema ne’e.

“ha’u husu ba parte Ministériu kompetente atu buka took solusaun ruma hodi bele fó solusaun ba  populasaun aldeia ida ne’e, liuliu bairru Seroja ne’e nia problema, liuliu ba populasaun sira ne’ebé afetadu ba konstrusaun Edifísiu São Miguel,” nia dehan.

Enkuantu, totál populasaun uma kain iha aldeia Golgota Bairru Seroja hamutuk 72, maibé uma kain ne’ebé afeta ba rai estadu seidauk iha tanba governu seidauk termina ninia baliza. (Lee Notísia Seluk Iha Jornál Timor Post/Asesu YouTube Timor Post).

No More Posts Available.

No more pages to load.