Komunidade Afaloikai Ladauk Asesu Eletrisidade

by -15 views
Xefe suku Afaloikai, Germano João Baptista. Foto TP/Caetano C Guterres

(Reportajen Caetano Guterres / Orlando Oki)

BAUKAU (Timor Post) Komunidade suku Afaloikai, postu administrativu Baguia, munisípiu Baukau husu ba oitavu governu liuliu Ministériu Obras Públika (MOP) atu instala ona liña eletrisidade.

Xefe suku Afaloikai, Germano João Baptista, hatete nia parte husu ba governu atu tun ba terenu hodi haree rasik ho matan kona-ba kondisaun moris povu nian iha suku Afaloikai, tanba Timor-Leste ukun rasik an ona maibé iha komunidade sira iha suku ne’e seidauk asesu ba infrastrutura bázika.

“Hahú Timor-Leste ukun rasik an kuaze tinan rua nulu resin ona maibé aldeia rua iha suku Afaloikai hanesan aldeia Lena ho Buibela seidauk hetan infrastrutura bázika liuliu liña eletresidade”, haktuir Germano ba Timor Post iha salaun autoridade munisípiu Baukau, Segunda (28/06).

Tuir nia, maski aldeia ne’e sai baze rezistensia ba asuwain Falintil sira inklui komandante en-xefe Kay Rala Xanana Gusmão durante tinan sia subar iha ne’ebá maibé depois de ukun an populasaun sira iha fatin ne’e to’o agora seidauk asesu ba ahi eletrisidade.

Nia hatete, xefe família husi aldeia Lena ho Buibela, Suku Afaloikai, postu administtrativu Baguia hamutuk 78 mak to’o agora seidauk asesu liña eletresidade, tanba ne’e iha tempu kalan obriga komunidade sira uza lampurina, mina rai, lilin ho kamii.

Germano hatutan, problema seluk ne’ebé populasaun sira husi aldeia rua ne’e enfrenta mak seidauk asesu transportasaun hodi tula sai sira nia produtu lokál ba merkadu inklui asesu ba fasilidade saúde.

“Problema seluk ne’ebé mak ami nia aldeia rua enfenta mak kona-ba estrada, tanba ami halo ona proposta dala hira ona ba MOP liuliu IJE maibé seidauk iha resposta”, hatete nia.

Nia esplika, bainhira inan feton sira hakarak atu ba partus iha fasilidade saúde Laisorulai, Iraler ho Afaloikai mós dook entaun sira partus de’it iha uma to’o labele salva, tanba iha tinan 2020 inan feton na’in lima inklui bebe mate.

Xefe suku rekomenda ba ministériu relevante atu tun direta ba baze hodi haree kondisaun infraestrutura iha aldeia rua refere. (Lee Notísia Seluk iha Jornal Diáriu Timor Post)