Kompañia Silas Entrega Karreta Bombeiru Hitu ba SEPS

by -304 views
Sekretariu Estadu Protesaun Sivil (SEPS), Joaquim Gusmão, halo hela observasaun ba karreta hitu ne'ebe entrega hosi kompania Silas, iha Edifisiu SEPS, Kaikoli, Dili, Segunda, (21/2), Foto TP/Maria Lizia

(Reportajen Cardenio Alves/Editor Mateus da Cruz)

DILI (Timor Post)-Hafoin liu hosi prosesu naruk, ikus mai kompañia Silas konsege entrega karreta bombeiru hamutuk hitu kompostu husi Toyota Hilux 3, Mersedes 2 no Hino 2, ba Diresaun Bombeiru iha Sekretariadu Estadu Protesaun Sivíl (SEPS), hodi utiliza halo operasaun iha terrenu.

Sekretáriu Estadu Protesaun Civil, Joaquim Gusmão, hatete, durante tinan 10 nia laran diresaun Bombeiru hasoru difikuldade iha terrenu liu-liu kona-ba karreta hodi halo operasaun bainhira mosu inséndiu, maibé ho karreta hitu ne’ebé iha ona nu’udar pasu pozitivu ida ba oin bele hatán ba dezastre ruma ne’ebé mosu.

“SEPS iha diresaun nasionál bombeiru marka tan pasu Ida ba oin,” nia dehan, iha Edifísiu SEPS, Kaikoli, Segunda, (21/02/2022).

Nia hatete,  durante ne’e  bombeiru uza karreta tanke ho modelu rega Jardin nian, maibé agora hosi karreta hitu ne’e iha karreta balun ho tanke própriu duni hodi kombate ba dezastre hanesan ahi-han Uma no seluktan.

Nia husu ba membru tomak diresaun nasionál bombeiru atu kuidadu didi’ak karreta sira ne’e atu nune’e bele fó seguru ba komunidade no nasaun bainhira hetan dezastre ka inséndiu.

Iha fatin hanesan, Diretór Jerál Administrasaun Finansas Ministériu Interior (DJAFMI), Mariano Araújo, hatete, karreta hira ne’e sosa liu hosi orsamentu Jerál Estadu 2021 nian, ne’ebé maka koloka ba iha Diresaun Bombeiru ho montante rihun 900 USD.

Prosesu sosa karreta hirak ne’e liu hosi konkursu públiku no kompañia vensedór konsege hatama Duni karreta Sira nee tuir prosedimentu legal.

Nia husu ba parte sira ne’ebé utiliza karreta hirak ne’e tenke uza ho kuidadu hodi fasilita no apoiu populasaun Sira ne’ebé hasoru problema.

Entretantu, Diretór Nasionál Bombeiru (DNB), Claudio da Silva, hatete, tanba situasaun Covid-19 prosesu sosa karreta bombeiru foin mak hahú tinan 2021, fulan Setembru nia laran, nune’e iha tinan ne’e kompañia Silas konsege hatama duni karreta hirak ne’e saida maka asina ona.

Serimónia ne’e partisipa husi Diretór jerál Administrasaun no Finansas Ministériu Interior, Diretór jerál protesaun civil, Diretór nasionál patrimóniu Estadu Ministériu interior, Diretór Bombeiru, diretór aprovizionamentu no Diretór Nasionál sira seluk. (Lee notisia seluk iha jornal Timor Post/asesu youtube Timor Post)

No More Posts Available.

No more pages to load.