Kompañia Muda Mákina ba Fatin Seluk Hafoin Sidonio Mate iha Laga, Família Ezije Justisa

by -210 views
Imajen ne'e hatudu Ofisial Kompañia Sinoma, Chen Siaojiang hala'o entrevista ho Jornalista Timor Post.

Timor Post (04/01/2021)—Família matebian Sidónio Lemos Ximenes ezije justisa tanba deskonfia iha manobra no la simu ho akontesimentu ne’ebé ho rajaun barak hatudu momoos kompañia ho naran Sinoma nia fallansu liuliu fó seguransa ba servisu nain sira nia vida.

João Brito Gusmão Ximenes nu’udar matebian nia maun deskonfia iha manobra balun kona-ba nia alin nia mate tanba antes ne’e matebian servisu iha parte halo alkatraun, maibé kompañia muda fali ba fatin produz manila to’o ikus mate.

Rajaun seluk halo família sira dúvida liu tan maka bainhira matebian hakotu iis, kompañia muda tiha mákina ne’ebé hakotu Sidónio nia vida ba fatin seluk molok polísia to’o iha fatin akontesimentu hodi dada liña polísia.

“Ami hakarak iha justisa tanba-sá mak ha’u nia alin servisu tiha iha fatin buti tombol seksaun halo alkatraun nian maibé ba fali iha seksaun beton nian ba mate iha mákina produs manila nian,” João hatete ba Timor Post iha Laga.

Nia mos kestiona kona-ba kompañia estranjeiru ne’ebé hala’o projeitu estrada husi Baukau ba Lautem laiha siguransa vida traballador sira nian hanesan farada servisu, kapaseti, luvas no seluk tan.

Tanba ne’e, nia husu ba SEFOPE atu tun ba terenu hodi haree traballadór Timoroan ne’ebé servisu iha kompañia ne’e.

Entretantu Ofisial Kompañia Sinoma, Chen Siaojiang ba Timor Post rekoñese nia mate hafoin hasai husi vox produs manila nia laran.

Nia haktuir kronolojia, iha momentu ne’eba Sidónio ho nia kolega sira servisu no nia rasik mak suru raihenek so’e ba mákina laran maka mákina kait iha kanuru no dada tama Sidónio ba mákina laran.

“Ami nia kolega Sidonio servisu hamutuk ho ninia maluk nain haat sira seluk servisu iha mákina produs manila, depois hetan asidente ida ne’e tanba kanuru ne’ebé nia kaer kona vox belit depois kanuru ho ema mákina dada tama ba vox laran nakdulas iha laran hafoin ninia kolega dada sai no ami tula duni ba sentru saude maibé la konsege salva nia vida,” Chen Xiaojiang haktuir iha nia servisu fatin iha Laga.

Chen dehan, razaun kompañia muda Sidonio ho ninia maluk nain tolu seluk tanba fatin alaktraun nian la la’o, aumezmu tempu vítima mos iha koñesimentu di’ak kona-ba alkatraun ho mos produs manila nian.

Chen mos dehan, razaun parte kompañia muda tiha vox fatin produs manila ne’ebé vítima mate iha laran ba fali fatin seluk molok polísia tau fita tanba masa iha hela vox laran fo impaktu ba mákina no vox a’at bainhira la halo mudansa.

Entretantu Komandante Polísia Eskuadra Laga, Primeiru Sarjentu Duarte Belo (Sorru) hatete,  nia parte akompaña hela prosesu hotu iha terrenu, no respeita família matebian lori prosesu ba justisa.

“Ha’u konvida responsabel kompañia Sinoma ho mos família matebian mai to’o iha ne’e tanba ami hanesan instituisaun PNTL ami fasilita prosesu ne’ebé mak iha, liu husi esplikasaun Timor nia kultura ba kompañia atu responsabel matebian nia mate to’o remata depende ba família matebian maibé depois liga ba família matebian maibé família lakohi hakarak halo prosesu ne’e tuir lei no halo autópsia maske kauza mate ne’e mate iha servisu laran,” Komandante Duarte  haktuir.

Jornalista: Caetano Ximenes

Editór: Noémio Falcão

No More Posts Available.

No more pages to load.