Kompania 7 Kompete iha Tenderizasaun ba Esplorasaun Petróleu Offshore no Onshore

by -537 views
Ministru MPM, Victor da Conceição Soares (karuk), partisipa iha atividade Meet The Press organiza husi SEKomS iha Salaun PCM, Palasiu Governu, Tersa (12/04). Imajen media SEKomS

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post) – Ministru Petróleu no Minerais (MPM), Victor da Conceição Soares, informa, MPM konklui ona promosaun ba bloku 18, atu promove explorasaun petroleu iha tasi laran (Offshore) no rai maran (Onshore).

Nia hatete, MPM nian tama ona iha prosesu pre-kualiflkasaun no tenderizasaun ba kompañia sira ne’ebe iha interese atu halo esplorasaun. Daudaun iha kompañia 7 maka tuir hela tenderizasaun ba esplorasaun petróleu iha tasi laran (Offshore) no rai maran (Onshore), rezultadu ne’e sei fó sai iha loron 15 Fulan Abril 2022..

“Ha’u hanoin agora daudauk iha empreza hamutuk 7 maka hetan kualifikasaun, maka hanesan empreza estatál Timor Gap EP, empreza pribada ETO Lda, Davida Petroleum DMCC, ENI, HTS Exploratio Ltd, Santos, no Supernova Energy B.V”, nia dehan Iha Salaun PCM, Palasiu Guvernu, Tersa (12/04).

Tanba setór ida ne’e iha risku ne’ebé maka’as, nune’e nia enkoraja empreza internasional sira ne’e  kuandu sira manan, kompañia iha obrigasaun atu loke office iha Timor Leste.

“ida ne’e regra ida ne’ebé mak estadu TL tenke hatete ba emprezáriu sira ne’e, hodi bele mai investe, no kuandu office iha Timor, konserteza tenke rekruta Timoroan sira hodi empregu kampu serbisu ba Timoroan sira,”nia tenik.

Nia hatete, nasaun Timor Leste riku ho poténsia mina tasi-laran (offshore) no rai-maran (Onshore), ida ne’e presiza tau matan ho servisu makas hodi halo esportasaun mai ita nia rai hodi ajuda dezenvolvimentu ba nasaun ida ne’e.

“Benefísiu sira maka nune’e, iha formasaun, bolsu estudu ba joven poténsia sira, fó mós kampu serbisu ba komunidade sira, no fó oportunidade ba partisipasaun emprezáriu lokál, ba iha atividade esplorasaun no produsaun, fornesimentu ekipamentu lojístika, no mós serbisu seluk ne’ebé mak bele fó benefisiu kresimentu ekonómiku iha rai laran.,” hakotu.  (Lee Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.