KOMJER La Hatene Motivu Membru PNTL Tiru Mate Joven Iha Baukau

by -903 views
Portavoz Komandu Jerál Polísia Nasionál Timor-Leste (PNTL), Superentendente Xefe Arnaldo de Araújo

(Jornalista Jaime Pires/Editor Suzana Cardoso)

DILI (Timor Post) – Komandu Jerál Polísia Nasionál Timor-Leste (KOMJER), liuhusi Portavós Superintendente Xefe, Arnaldo de Araújo, seidauk hatene motivu husi membru (PNTL) tiru mate joven ida iha Munisípiu Baukau.

Tuir Arnaldo ba Jornalista sira liuhusi konferénsia imprensa ne’ebé mak realiza iha, Komandu Jerál Polísia Nasionál Timor-Leste, Kaikoli Kuarta (04/11).

“Motivu tanba saida mak kazu ne’e mosu ita seidauk hatene, tanba ekipa investigadór sei halo investigasaun no ohin ekipa (PNSIK) iha Komandu Jerál ba ona Baukau hamutuk ho investigadór iha Baukau, hodi bá buka tan informasaun hodi rekolla tan evidénsia balun”, nia esplika.

Arnaldo deklara, suspeitu hanesan membru PNTL ho naran inisiál FCS ne’ebé mak tiru mate joven na’in ida no hakanek ida ne’e, daudaun iha ona sela detensaun Komandu PNTL Munisípiu Baukau, tanba iha momentu ne’ebá kaptura ho fragalante delitu.

Nia aumenta, Vítima ho naran inisiál NC ne’ebé mak mate, iha momentu ne’ebá lori kedas mai iha HNGV hodi halo prosesu autópsia, nune’e Vítima kanek ne’e ho naran inisiál  DFNF.

Komandante ne’e dehan, Vítima mate ne’e ho idade (21), hela fatin iha Seisál, nune’e Vítima kanek ne’e hela fatin iha Samalari hanesan estudante.

“Atu hatete tan katak, kazu ne’e la involve entre arte marsiais, maibé motivu ita seidauk hatene, hein prosesu investigasaun mak ita foin hatene los nia motivu ne’e oinsá”, nia dehan,

Enkuantu kazu ne’e akontese iha Suku Samalari, Postu Administrativu Baukau Vila, Munisípiu Baukau iha loron Segunda (01/11) maizumenus tuku hitu kalan.(***)

No More Posts Available.

No more pages to load.